الماتى قالاسى سانيتارييالىق-ەپيدەميولوگييالىق باقىلاۋ دەپارتامەنتٸنٸڭ باسشىسى, قالانىڭ باس مەملەكەتتٸك سانيتار دەرٸگەرٸ جانداربەك بەكشين ونلاين بريفينگتە مەگاپوليس تۇرعىندارىنىڭ 23 پايىزىندا كوروناۆيرۋسقا قارسى يممۋنيتەت قالاپتاسقانىن ايتتى, دەپ حابارلايدى "ۇلت اقپارات".
ونىڭ ايتۋىنشا, الماتىدا قازٸر 23%-دى يممۋندى قابات قالىپتاستى. حالىقتىڭ 18%-ى ۆاكتسينا الدى, 5%-ى اۋىرىپ جازىلعاندار.
«ماۋسىم ايى باستالعالى الماتىدا كوروناۆيرۋس جۇقپاسىنىڭ تاراۋى ەكٸ ەسە ازايدى. سوڭعى تەۋلٸكتە كوروناۆيرۋستىڭ 112 جاعدايى تٸركەلدٸ. ناۋرىز ايىندا – 9,5 مىڭ جاعداي, سەۋٸردە 20 مىڭعا دەيٸن جەتكەن. قازٸر اۋرۋشاڭدىق دەڭگەيٸ تٶمەندەپ, تۇراقتاندى. بۇل قالادا كوروناۆيرۋسقا قارسى جٷيەلٸ تٷردە جٷرگٸزٸلگەن جۇمىستىڭ نەتيجەسٸ, ونىڭ ٸشٸندە حالىقتى جاپپاي ۆاكتسينالاۋ بار», - دەدٸ جانداربەك بەكشين.
سونىمەن قاتار, ول حالىقتىڭ 100 مىڭىنا شاققاندا اۋرۋ دەڭگەيٸنٸڭ تٶمەندەۋ قارقىنى تۇراقتى ەكەنٸن اتاپ ٶتتٸ.
«سوڭعى 7 كٷندە 64,7-دەن 39,8-گە دەيٸن ازايدى, رەپرودۋكتيۆتٸ سان 0,79 دەڭگەيٸندە تۇراقتاندى. بۇل «جاسىل ايماق» پارامەترلەرٸنە ساي», - دەدٸ ول.
