قر تٶتەنشە جاعدايلار مينيسترلٸگٸ رەسپۋبليكالىق قۇتقارۋ جاساعىنىڭ ماماندارى الماتىداعى تاۋدا جوعالعان ەر ادامدى ٷش تەۋلٸك بويى ٸزدەستٸرٸپ جاتىر, دەپ حابارلايدى "ۇلت اقپارات".
12 جەلتوقساندا رەسپۋبليكالىق جاساقتىڭ كەزەكشٸ پۋلتٸنە 35 جاستاعى ەر ادام تيتوۆ اۋدانى ماڭىندا اداسىپ كەتكەنٸ تۋرالى حابار تٷسكەن.
«ول كٷندٸز تاۋعا شىعىپ, قايتاردا سوقپاعىنان اداسقان. قاراڭعى ەرٸ سۋىق بولعاندىقتان ٶز بەتٸمەن تٶمەن تٷسە الماعان. كينولوگييالىق توپ ەر ادامدى ٸزدەۋگە جولعا شىقتى. اۋا رايى قولايسىز بولعانىنا قاراماستان, ٸزدەستٸرۋ جۇمىسى تٷنٸ بويى جٷرگٸزٸلدٸ. 12-14 جەلتوقسانداعى ٸزدەستٸرۋگە 39 قۇتقارۋشى, 5 كينولوگييالىق قۇرام, 6 كٶلٸك جۇمىلدىرىلدى», - دەدٸ باسپاسٶز قىزمەتٸنەن.
بٷگٸنگٸ تاڭدا جاساق قۇتقارۋشىلارى قۇمبەلسۋ ٶزەنٸنٸڭ بويىمەن جوعالعان ادامنىڭ سوڭعى گەوللوكاتسيياسىنا بارا جاتىر.
قۇتقارۋشىلار اۋا رايىنىڭ بۇزىلعانىنا قاراماستان ٸزدەستٸرۋدٸ توقتاتپادى. ەزٸرگە ەشقانداي جاڭالىق جوق.
