الماتى وبلىسىندا مەديتسينالىق كادرلار جەتٸسپەۋشٸلٸگٸ مەسەلەسٸن شەشۋ ٷشٸن بارلىق اۋدان, قالالاردا ماماندارعا ارنالعان 126 پەتەر ساتىپ الىنادى. وسى ماقساتقا 756 ملن. تەڭگە بٶلٸندٸ. بۇل تۋرالى الماتى وبلىسىنىڭ ەكٸمٸ ا. باتالوۆتىڭ ەسەپتٸ جيىنىندا ايتىلدى, دەپ حابارلايدى "ۇلت اقپارات".
كادر تاپشىلىعىن شەشۋدٸڭ تاعى بٸر جولى رەتٸندە 47 ارنايى مامان ٶتە قات ماماندىقتار بويىنشا رەزيدەنتۋرادا وقىپ جاتسا, ەلٸمٸزدٸڭ مەديتسينالىق جوعارى وقۋ ورىندارىندا 36 ستۋدەنت ەكٸم گرانتىمەن بٸلٸم الىپ جٷرگەنٸ دا سٶز بولدى.
- بيىلعى جىلدان مەديتسينالىق ۇيىمدار مٸندەتتٸ مەديتسينالىق ساقتاندىرۋ جٷيەسٸنە كٶشتٸ. وسىعان بايلانىستى حالىقتىڭ مەديكو-سانيتارلىق كٶمەك نىساندارىنا قولجەتٸمدٸلٸگٸن قامتاماسىز ەتۋ – اتقارۋشى ورگانداردىڭ نەگٸزگٸ مٸندەتتەرٸنٸڭ بٸرٸ. وسى ماقساتتا تالدىقورعانداعى 6-شى شاعىن اۋدانداعى 16 قاباتتى تۇرعىن ٷيدٸڭ بٸرٸنشٸ قاباتىنان 320 ادام قابىلدايتىن العاشقى مەديكو-سانيتارلىق ورتالىق اشىلعان. وعان قوسا بيىلعى جىلى 3,8 ملرد. تەڭگەگە 9 دەرٸگەرلٸك امبۋلاتورييا مەن مەدپۋنكت سالىنادى, - دەدٸ اماندىق باتالوۆ ٶز بايانداماسىندا.
