الماتىداعى "الماتى مارافونىنىڭ" 47 جاستاعى قاتىسۋشىسى رٷستەم سادىقوۆ مەرە سىزىعىن كەسٸپ ٶتكەننەن كەيٸن قايتىس بولدى, - دەپ حابارلايدى Tengrinews.kz اگەنتتٸگٸ "الماتى مارافونى" سايتىنا سٸلتەمە جاساپ.
مەرەدە كەزەكشٸلٸكتە جٷرگەن جارىستىڭ باس دەرٸگەرٸ ورازبەك ساحوۆتىڭ ايتۋىنشا, قاتىسۋشى رەسپۋبليكا الاڭىندا مەرە سىزىعىن كەسٸپ ٶتٸپ, بٸرنەشە مەتر ٶتكەننەن كەيٸن بٸردەن قۇلاعان.
"بٸز وعان بٸردەن كٶمەك كٶرسەتە باستادىق. العاشقى كٶمەكتٸ ەرٸكتٸلەر كٶرسەتتٸ. ودان كەيٸنگٸ جٷرەك-ٶكپە رەانيماتسيياسى قالالىق جەدەل جەردەم ستانساسىنىڭ قىزمەتكەرلەرٸمەن بٸرلەسٸپ جٷرگٸزٸلدٸ. باستاپقىدا جٷرەك ٸسكە قوسىلدى, سينۋس ىرعاعى پايدا بولدى, 2 مينۋتتان كەيٸن جٷرەك ۇستاماسى قايتا باستالدى. رەانيماتسييالىق شارالار 30 مينۋتقا سوزىلدى, ونىڭ ٸشٸندە سوڭعى 10 مينۋت جەدەل جەردەم كٶلٸگٸندە جاسالدى. 10:15-تە قاتىسۋشى قايتىس بولدى. رەسمي سەبەپ سوت-مەديتسينالىق ساراپتامادان كەيٸن عانا اتالۋى مٷمكٸن", - دەدٸ ورازبەك ساحوۆ.
مارقۇمنىڭ جاقىندارى ول جٷگٸرۋ شاراسىنا بٸرٸنشٸ رەت قاتىسىپ وتىرماعانىن ايتادى. سەۋٸر ايىندا الماتى جارتىلاي مارافونىندا, 2021 جىلى الماتى مارافونىندا 10 شاقىرىم قاشىقتىقتا جٷگٸرگەن.
جارىستى ۇيىمداستىرۋشىلار مارقۇمنىڭ تۋىستارى مەن جاقىندارىنا قايعىرىپ كٶڭٸل ايتادى. رٷستەم استانادان جارىسقا ارنايى كەلگەن, ۇيىمداستىرۋشىلار ونىڭ دەنەسٸن ٶز قالاسىنا تاسىمالداۋعا قارجىلاي كٶمەك كٶرسەتەدٸ.
