"ٶزٸڭدٸ-ٶزٸڭ ٶلتٸرۋ – قوعامنان جەڭٸلگەنٸڭدٸ مويىنداعانىڭ" دەيدٸ وسكار ۋايلد. بٷگٸنگە دەيٸن وقىپ, بٸلگەنٸم بويىنشا: ەدگار اللان پو جىندانىپ, الەكساندر بلوك سالقىن بٶلمەدە اشتىقتان ٶلگەن. نيكولاي گۋميلەۆ اباقتى اۋلاسىندا اتىلعان. ۆلاديمير ماياكوۆسكيي دە وققا ۇشقان. مارينا تسۆەتاەۆا ٶز تٷبٸنە ٶزٸ جەتكەن. فرانتسۋا ۆييون دارعا اسىلعان. يۋكيو ميسيما حاراكيري جاساعان. "كٶزٸنە اجال ەلەستەگەن" ەرنەست حەمينگۋەي ٶز-ٶزٸن اتىپ تىنعان. ميحايل لەرمونتوۆ پۋشكيننٸڭ تاعدىرىن قايتالاعان. حايزى ٶزٸن پويىزدىڭ استىنا سالعان.
ال, عۇمىر تاۋقىمەتٸن كٶپ تارتقان اكۋتاگاۆا وتىز بەس جاسىندا دەرٸ ٸشٸپ ٶلگەن.
وسى جانكەشتٸلەردٸ "بۇلاردىڭ بەرٸ رۋحاني جان دٷنيەسٸ مازاسىز ٸزدەنٸسٸنٸڭ قۇربانى بولعاندار..." دەگەن ەمٸرحان بالقىبەكتٸڭ سٶزٸمەن قورعاپ قالا الامىز با?!
...اكۋتاگاۆا ريۋنوسكە. كلاسسيك. "راسيومون قاقپاسى" وعان تانىمالدىلىق ەكەلسە, "مۇرىنى" ۇستازى ناتسۋمە سوسەكيدٸ تاڭ قالدىردى. ال, بٸز اۋدارعان (ن. فەلدماننان) "ناقۇرىستىڭ ٶمٸرٸ" اتتى نوۆەللاسىن اسپانىنا اجال بۇلتى ٷيٸرٸلمەس بۇرىن اياقتاعان.
ٶلەرٸنٸڭ الدىندا جازۋشى دوسى كۋمە ماساوعا شىعارماسىمەن بٸرگە قالدىرىپ كەتكەن حاتىندا بىلاي جازادى: "قولجازبانىڭ جارىق كٶرۋٸ جٶن بە ەدٸ?! سونداي كٷن تۋار بولسا, ونىڭ وقىرمان قولىنا تيەرگە دەيٸنگٸ بارلىق ماشاقاتى سەنٸڭ ارقاڭا جٷك.
مىنا پاراقتارداعى كەيٸپكەرلەردٸ بٸلەسٸڭ. تۋىندىممەن كٶپشٸلٸكتٸڭ تانىسۋىنا سٶزسٸز دايىنمىن, بٸراق, تۇلا بويىنداعى تارقاتىلعان تاعدىردىڭ كٸمدٸكٸ ەكەندٸگٸ جۇمباق كٷيٸندە قالعانىن قالايمىن.
مەنٸڭ كەۋدەمدٸ كٷن سايىن كٷرسٸنٸس كٷيەلەيدٸ. ول, بەلكٸم, باقىتىمنان... سىرت كٶزگە وعاش كٶرٸنەرٸ انىق, الايدا, ەش ٶكٸنبەيمٸن. تەك قايىرسىز ۇلى, قييالىن قۇشقان كٷيەۋٸ, تانىماسقا اينالعان تۋىسى بولعان جاندار ٷشٸن قامىعامىن. ەندەشە, قوش! بٸلە جٷر, مەن سانالى تٷردە ٶزٸمدٸ اقتاپ الۋعا تىرىسقان جوقپىن!
اتالمىش ەڭبەگٸمدٸ ساعان عانا اماناتتايمىن. سەبەبٸ, سەن مەنٸڭ جانىمدى بەرٸنەن ارتىق ۇعاسىڭ. اقىماقتىعىما كٷلەرسٸڭ, مٷمكٸن...
20 ماۋسىم, 1927 جىل"
"ەدەتتە ەدەبي شىعارمانى راحات ٷشٸن وقيدى." كەۋدەسٸندە تۇنعان سىر حاقىندا ونىڭ ٶزٸ سٶيلەسٸن... جاپون جازۋشىسىنىڭ ٶمٸربايانى ٸسپەتتەس نوۆەللاسىن قازاق تٸلٸندە وقىڭىز!
مارلەن عيلىمحان
ناقۇرىستىڭ ٶمٸرٸ
دەۋٸر
ول جيىرما جاستا... ەلدەبٸر كٸتاپ دٷكەنٸنٸڭ ەكٸنشٸ قاباتىندا قاز-قاتار تٸزٸلگەن سۋ جاڭا جيناقتارمەن ەۆروپالىق ٷلگٸدەگٸ جيىلمالى ساتى ارقىلى تانىسىپ تۇر. موپاسسان, بودلەر, ستريندبەرگ, يبسەن, شوۋ, تولستوي...
قاس قارايا باستاعانىنا قاراماستان كٶزدٸڭ جاۋىن الاتىن قالىڭ تومدارداعى جازۋلاردان جانارىن تايدىرماعانى – تانىمىنىڭ اياسىن كەڭەيتۋگە دەگەن زور قۇشتارلىعىنان... اڭسارىن اۋدارعان تەك اۆتورلار ەمەس, بٸلدەي بٸر عاسىر. نيتسششە, ۆەرلەن, اعايىندى گونكۋرلەر, گاۋپتمان, دوستوەۆسكيي, فلوبەر...
ىمىرت ىعىستىرا باستاعان جارىققا جارماسىپ جٷرٸپ, ەلەۋلٸ ەسٸمدەردٸ ساناسىنا سٸڭٸردٸ. بٸراق, كٸتاپتار سەت سايىن قويۋ قاراڭعىلىقتىڭ شىمىلدىعىنىڭ تاساسىنا تىعىلا بەردٸ. قۇلشىنىسى سارقىلۋعا اينالعان جٸگٸت تٶمەنگە تٷسۋگە ىڭعايلانعاندا تاس تٶبەسٸنەن ەلەكتر جارىعى جاندى.
بيٸكتەن ەدەتتەگٸدەن كٸشكەنتاي بوپ كٶرٸنگەن سٶرەلەر اراسىنداعى ساتۋشى مەن ساتىپ الۋشىلار سونداي جان ايارلىق حەلدە ەدٸ.
- ادام ٶمٸرٸ بودلەر جازعان ٶلەڭنٸڭ بٸر جولىنا دا تاتىمايدى.*
...بٸراز ۋاقىت "ايانىشتىلارعا..." كٷيٸنە تەلمٸردٸ.
انا
سۇرعىلت تٷستٸ كيٸمدەگٸ ناۋقاستار قويىنىنا قۇيىلعان رەڭٸ تٷنەرٸڭكٸ, كٶلەمٸ ات شاپتىرىم بٶلمەنٸڭ اجارى كٶڭٸلسٸزدٸككە سٷڭگٸگەن. اقىلىنان الجاسقان كٷيٸ جان-تەنٸمەن فيسگارمونييادا ەنۇران ەۋەندەرٸن ويناعان ەيەلدەن ٶزگە بٸرەۋٸ بيگە قۇمارتسا كەرەك, سەلك-سەلك سەكٸرەدٸ.
ول بەتٸنٸڭ ەكٸ ۇشى قىزارعان دەرٸگەردٸڭ "ەتٸ ٷيرەنگەن كٶرٸنٸسٸنە" كٶپ قارادى.
راسىندا, اۋادا قالقىعان يٸسكە دەيٸن ەسٸنە تٷسٸرگەن اناسىنىڭ ون جىل بۇرىن "وسىلاردان" مٷلدە ايىرماسى جوق-تۇعىن. تٷك تە...
- ال, جٷرەيٸك...
ەكەۋٸ دەلٸز بويىنداعى تٷرٸ تٷندەي بۇيىعى تٶرت قابىرعانىڭ بٸرٸنە كٸردٸ. بۇرىشتاعى سپيرتتەلگەن ادام ميى سالىنعان ٷلكەن شىنى قۇتىلاردان جەڭٸل, ەرٸ اقشىل ۇشقىندار بايقالادى. جۇمىرتقا اقۋىزىن سەۋٸپ قويعان سەكٸلدٸ... جول سٸلتەۋشٸسٸمەن بولعان ەڭگٸمە بارىسىندا دا ويىنان اناسى كەتپەدٸ.
- ٶزٸن اۋقىمى زور, ەلەكتر توگىن تاراتاتىن جارقىراعان قارا ماشينا سانايتىن مىنا ميدىڭ يەسٸ N. كەسٸپورىنىندا ينجەنەر قىزمەتٸن اتقارعان.
سەرٸگٸنە تۋرا قاراۋدان جاسقانعان جٸگٸتتٸڭ نازارى دالاعا اۋدى. ٷستٸندە جاڭعاقشا شاعىلعان بٶتەلكەلەردٸڭ سىنىقتارى شاشىلعان تاس دۋالدان باسقا ەشتەڭە كٶرٸنبەدٸ. تەك كٸرپٸشتٸ باسقان سيرەك مٷكتەرگە كٶمەسكٸ سەۋلە شاشقان ەينەك ٷگٸندٸلەرٸ اعاراڭدايدى.
جانۇيا
ٶزٸ ون ەكٸ جاسقا تولعاندا الپىستى القىمداعان, وڭ بوساعادا وتىرىپ قالعان, قانشا سٶزگە كەلسە دە, بەرٸنەن ارتىق سىيلايتىن اپاسىمەن جيٸ بولاتىن جانجال ٶگەي ەكە-شەشەسٸنٸڭ تاتۋلاستىرۋىمەن اياقتالاتىن.
ول بورپىلداق توپىراقتىڭ كەسٸرٸنەن قيسايعان قالا سىرتىنداعى ٷيدٸڭ تٶبەسٸندەگٸ ٷيشٸكتە ٶتكٸزگەن ۋاقىتىندا ادامدار بٸر-بٸرٸن قانشالىقتى جاقسى كٶرسە, نەگە سونشالىقتى قينايتىنى تۋرالى كٶپ ويلايتىن. مۇنداي شاقتا بويىن ٷرەي بيلەيتٸن. قۇجىراسى قۇلاپ بارا جاتقانداي...
توكيو
سۋميداگاۆا ٶزەنٸنٸڭ ٶڭٸن بوز تۇمان تورلاعان. جايمەن جٷزگەن كەمەنٸڭ تەرەزەسٸندە مۋكودزيما ارالىندا ٶسكەن شيە اعاشتارى جايقالادى.
بارىن باعزىدا بايقاتقان, باستاۋىن ەدو زامانىنان الاتىن تالدارداعى تٷينەكتەر ارقان بويىنا ٸلگەن قومىتتاي اجارسىز.
مەن
تەمەكٸسٸن توقتاۋسىز تارتىپ, ەسكٸ تانىسىمەن دەمحانادا وتىر. جۇمعان اۋزىن اشپادى دا... بٸراق, سەرٸگٸنٸڭ سٶزٸن ٸجداھاتپەن تىڭدادى.
- بٷگٸن جارتى كٷن بويى كٶلٸكپەن جٷردٸم.
- جۇمىستارىڭمەن بە?
ٷستەلگە شىنتاعىن تايانىپ, نەمقۇرايلى جاۋاپ قاتتى:
- جوق, جاي عانا قىدىرعىم كەلدٸ!
بۇل سٶزدەر شىلىم ۋلاعان ساناسىن ەلدەنەگە باسىبايلىلىقتان بوساتىپ, بەيمەلٸم ەلەمگە, انىعىندا, تەڭٸرگە جاقىن جەكە «ەگوسىنا» جول اشىپ, ارقاسىنا اۋىرتپالىق ارتتى. قۋانىپ تا قالدى.
مەيرامحانا تىم تار...
پان قۇدايىنىڭ سۋرەتٸنٸڭ استىندا تولىق, ەتتٸ كاۋچۋك اعاشىنىڭ جاپىراعى قىزىل قىش قۇمىرادان باس قىلعيتادى...
دەرت
ايدىننىڭ جۇلقىنا سوققان جەلٸن ەلەمەي, اعىلشىن سٶزدٸگٸنە ساۋساق جٷگٸرتتٸ.
«Talaria – قاناتتى اياق كيٸم.
Tale – ەڭگٸمە.
Talipot – شىعىس ينديياداعى پالما. دٸڭٸ ەلۋدەن جٷز فۋتقا دەيٸن بيٸك ٶسەدٸ, جاپىراقتارى قولشاتىر, جەلپۋٸش, قالپاق جاساۋعا پايدالانىلادى. عاجابى جەتپٸس جىلدا بٸر گٷلدەيدٸ...»
كٸتاپ تانىستىرعان اعاشتىڭ كەيپٸن ەلەستەتتٸ. كەنەت تاماعى قىشىپ, تٷكٸرٸپ تاستادى. سٸلەكەيگە ۇقسامايدى.
جالعاننىڭ قامشىداي شولاقتىعىن ويلادى.
...تەڭٸزدٸڭ ارعى جاعىندا ىرعالعان پالمانىڭ گٷلٸ.
كارتينا
بەرٸ توسىننان بولدى. كٸتاپ دٷكەنٸندە ساقتالعان ۆان گوگ سۋرەتتەرٸنٸڭ كٶشٸرمەلەرٸندەگٸ تابيعاتتىڭ بالعىندىعىنان جيۆوپيستٸڭ نە ەكەنٸن تٷسٸندٸ.
بۇتاقتاردىڭ بيٸنە, اينالاسىنداعى ەيەلدەردٸڭ جٷزٸنە جيٸ ٷڭٸلۋدٸ ەدەتكە اينالدىرۋى مىنا دٷنيەگە بٶلەك كٶزقاراسپەن قاراۋدى ٷيرەتكەن كارتينالاردىڭ ەسەرٸ شىعار...
كٷزدٸڭ جاڭبىرلى قاراكەۋٸمٸندە شاھار شەتٸندەگٸ تەمٸر جول كٶپٸرٸنٸڭ استىمەن اياڭداپ كەلەدٸ. جٷك ارباسى تٶسەمە ٷيمەسٸنە تٸرەلە توقتاعان. ەلەۋسٸز تاستاق جولعا ٶزٸنەن بۇرىن كٸمنٸڭ تابان تيگٸزگەنٸ تۋرالى ويلاۋ ەشقانداي پايدا ەكەلمەدٸ. بۇيرا بۇلتى ماڭىپ, تٷنەرگەن اسپاننىڭ كەسكٸنٸن كەسٸك قۇلاقتى, تٸسٸنە قىستىرعان ۇزىن مٷشتٸگٸن قۇشىرلانا سوراتىن گوللاندىق قالاي سەزٸنسە, جيىرما ٷشتەگٸ ول دا سولاي تٷيسٸندٸ.
ۇشقىن
جٷزٸن جاۋىن جۋعان جولدىڭ ايعىز شالشىعىندا قالقىدى... سوڭىنان كٷننٸڭ كٷركٸرٸن لەستٸرگەن جاڭبىردىڭ قارقىنى قاتتى. توزاڭدانعان رەزەڭكە پەلتەسٸنٸڭ تامشى تيگەن تۇسىنان جاس يٸس اڭقىدى.
كٶز ۇشىنداعى سىم ورامىنان قىزعىلت ۇشقىن تۇتاندى. بويىن دٷدەمال دٸرٸل بيلەدٸ. تٶس قالتاسىندا دوستارىنىڭ مەرزٸمدٸ باسىلىمىنا دايارلاعان قولجازباسى بار. جانارى ٶزٸن دەلسال كٷيگە تٷسٸرگەن توك ٸزدەرٸندە.
اۋاعا ٶرمەلەپ, ٶلٸم قۇشقان جارقىلدار باياعىسىنشا ٶتكٸر. پەندە فەنيٸنەن ٸزدەگەنٸن تاپپاعان ول تەك ۇشقىنداردى عانا... شىبىن جانىن شەيٸت قىلسا دا ۋىسىندا ۇستاۋعا ۇمتىلدى...
ٶلٸك
مەيٸتتەردٸڭ باس بارماعىنان اتى مەن جاسى بەلگٸلەنگەن تاقتايشا سالبىرايدى. جۇمىسقا قىزۋ كٸرٸسكەن جولداسى ەڭكەيٸپ, ەپپەن قانداۋىر پىشاقتى سۇققان ەلدەبٸر بەت تەرٸسٸنٸڭ استىنان ەدەمٸ ماي سارعايادى.
ٶزٸ كٶزٸن الماي تۇرعان باقيلىقتىڭ ٶڭٸ ەجەلگٸ ەستەلٸكتەر جازىلاتىن نوۆەللا ٷشٸن كەرەك. شٸرٸگەن ٶرٸككە ۇقسايتىن جانسىز تەننٸڭ يٸسٸ جاعىمسىز.
- سوڭعى ۋاقىتتا ٶلٸكتەردٸ كٶپ ەكەلمەيدٸ, – دەدٸ اسىقپاي قولىنداعى قۇرالىن قيمىلداتا بەرگەن دەرٸگەر تومسىرايىپ. ساناسىندا سايراي جٶنەلگەن «ەگەر مەن وسى سالانىڭ مامانى اتانىپ, ٸسٸمنٸڭ العا باسۋىنا اجال اۋىزدىقتاعانداردىڭ ازدىق ەتۋٸ كەدەرگٸ بولسا, ادامداردى ەش سەبەپسٸز جازىم قىلار ەم...» دەگەن ويى ايتىلماي, ٸشٸندە تۇنشىقتى.
ۇستاز
كٷزگٸ كٷننٸڭ شۇعىلاسىنا شومىلعان اعاش جاپىراقتارىنىڭ سىبدىرى ەستٸلمەۋٸ, اسپاننىڭ اپاي تٶسٸندە تارازىنىڭ قوس شىنى توستاعانىنىڭ تەڭ سالماقپەن تىنشىپ تۇرۋى – كەرٸ ەمەننٸڭ ساياسىندا, ۇستازىنىڭ كٸتابىن پاراقتاعان مەزگٸلٸندە كٶز الدىنا كەلە قالعان كٶرٸنٸس.
تاڭسەرٸ
الاگەۋٸم. ۇستازىمەن جولىققانىنا ٷش اي ٶتكەن. تەمەكٸسٸن كەربەزدەنە تارتىپ, كٶشە بۇرىشىنداعى ٷلكەن بازاردىڭ ورتالىعىنا بەت الدى. نٶپٸر حالىق پەن جٷك اربالارى تاڭ ارايىنا مالىنعان. اياق استىنان بالاققا جارماسقان كٸشكەنتاي قارا يتتەن قورىقپادى. تٸپتٸ, ۇناتتى.
شىنار بۇتاقتارىنىڭ اراسىنان جۇلدىزدى اسپاندى تاماشالاعان ول جيىرما بەس جاستا ەدٸ.
ەسكەري كەمەجاي
سٷڭگۋٸر قايىقتىڭ ٸشٸ الا كٶلەڭكە. ٷرەي ۇشىراتىن مەحانيزمدەردٸڭ ورتاسىندا جانارىن تٶسەگەن دٷربٸنٸڭ كٶزدٸگٸنەن كەمەجايدى كٶردٸ.
«بۇل جەردەن "كونگونى" بايقاۋعا بولاتىن شىعار?» دەگەن فلوت وفيتسەرٸنٸڭ داۋىسىن ەستٸدٸ.
ۇلتاراقتاي ەسكەري كەمەدەگٸ تٶرتبۇرىشتى لينزاعا زەر سالعان ول وتىز سەنگە ساتىپ الۋعا بولاتىن قاقتاپ قۋىرىلعان كەسەك ەتتەن از-مۇز اڭقيتىن كٶك بالدىردىڭ يٸسٸن اڭسادى.
ۇستازدىڭ قازاسى
جاڭا بەكەتتٸڭ پەررونىن كەزٸپ جٷر. نٶسەردەن كەيٸن جەل كٷشەيگەن. كٷن كٷڭگٸرتتەنگەن. تەمەكٸ تٷتٸندەتكەن الاڭ شەتٸندەگٸ تەمٸر جول قىزمەتكەرلەرٸ ەن سالدى.
الايدا, ونىڭ كٶڭٸل كٷيٸ مەن ەۋەندٸ جەل ەۋەلەتٸپ ەكەتتٸ. شىلىمىن تۇتاتپادى. جان دٷنيەسٸ الاي - دٷلەي. پەلتەسٸنٸڭ قالتاسىندا «ۇستازىڭ ٶلٸم اۋزىندا» دەگەن جەدەلحات جاتىر.
تاڭعى التىدا توكيوعا اتتاناتىن پويىز ماتسۋياما تاۋىنان بەرٸ اسىپ, بۋى بۇرق-سارق ەتٸپ, جىلانشا يرەلەڭدەپ كەلەدٸ.
نەكە
ەپكەسٸنٸڭ ايتاقتاۋىمەن نەكەلەسكەن كٷننٸڭ ەرتەسٸ «مۇنشالىقتى شىعىندانباۋ كەرەك ەدٸ...» دەپ كٷيەۋٸ سٶككەن ەيەل ٶزٸنە ارناپ ساتىپ الىنعان اقشىل سارى نەركەس گٷلٸ بەينەلەنگەن قۇمىرانىڭ قاسىندا... تەك ونىڭ الدىندا عانا ەمەس, قايىن اپاسىنان دا كەشٸرٸم سۇرادى.
ولار بۇتاعى جايىلعان بانان اعاشىنىڭ كٶلەڭكەسٸندە تاتۋ-تەتتٸ كٷن كەشتٸ. ٷيلەرٸ قالا تٶڭٸرەگٸندە, توكيودان بٸر ساعاتتىق جەردە ورنالاسقان
جاستىق
وبەكتيۆتٸك دٷنيەنٸ تانىپ-بٸلۋ مٷمكٸندٸگٸنە سەنبەيتٸن كٷمەنشٸلدٸك راۋشانىنىڭ جۇپارى مٷڭكٸگەن اناتول فرانستى وقىپ جاتىپ, جاستانعان جاستىعىندا كەنتاۆر بەينەسٸنٸڭ قالاي پايدا بولعانىن بايقامادى...
كٶبەلەك
بالدىر يٸسٸمەن سۋارىلعان اۋادا شىر اينالىپ جٷرگەن كٶبەلەكتٸڭ قاناتى بٸر سەت كەپكەن ەرنٸنە تيگەنٸ ەسٸندە... ودان قالعان توزاڭنىڭ تابى ۇزاق جىل بويىن تاڭدانىستان ارىلتپادى.
اي
مەيمانحانانىڭ باسپالداعىندا كەزدەيسوق جولىعىستى. كٷندٸز دە كەلبەتٸ جٷزٸ جارقىراعان اي ٸسپەتتەس. كٶزبەن شىعارىپ سالىپ تۇرىپ, (ولار مٷلدە كەزدەسپەگەن) بٷگٸنگە دەيٸن كەۋدەسٸنە كٷپتەلگەن ساعىنىش سارىنداس سەزٸم جٷرەگٸن قوزعادى...
جاساندى قاناتتار
اناتول فرانس ٸلٸمٸن يگەرە سالا, ححVIII عاسىردىڭ ويشىلدارىنا ويىستى... رۋسسونىڭ پەلساپاسىن پاراقتاماعان سەبەبٸ: ودان ٶزٸنٸڭ بولمىسىندا بار قىزۋ قاندىلىقتى بايقاعاننان... باتپان قۇيرىق ويدىڭ دەرگەيٸنە جيٸ ۇمسىناتىندارى ۇقساعاننان «كانديدانىڭ» اۆتورىن قولىنا الدى.
جيىرما توعىزدا... عاپىل عۇمىرىنىڭ توستاعىنان تاتار زەمزەمٸ تاۋسىلعانداي. بٸراق, ۆولتەر جاساندى قاناتتار سىيلادى.
ول جازۋشىدان العان ٷمٸتٸن ورانىپ, اسپاندادى... سانا سەۋلەسٸ بەرگەن پەندەۋي باقىت پەن قاسٸرەت تٷيسٸگٸنەن ٸزٸم-عايىم جوعالدى.
كٷننٸڭ كٶزٸ دەل وسىنداي جاساندى قاناتتارىن كٷيدٸرٸپ, تەڭٸزگە قۇلاپ ٶلگەن ەجەلگٸ گرەكتٸڭ ٶمٸرٸن ٶزٸنە ٶنەگە قىلماي, سۇرىقسىز كٶشەلەرگە كەلەكە مەن كەكەسٸندٸ تاستاپ, ادام شارلاماعان كەڭٸستٸك داڭعىلىمەن تۋرا تارتىپ بارادى...
بۇعاۋ
گازەت رەداكتسيياسىنا قىزمەتكە ورنالاسۋىنا بايلانىستى ەيەلٸ ەكەۋٸ ٶگەي ەكە-شەشەسٸنٸڭ ٷيٸنە قونىستاندى. بار سەنٸمٸ ارتىلعان سارعىش پاراقتاعى ەكٸ جاقتى ەڭبەك كەلٸسٸم شارتى اقىر سوڭىندا باسپاعا ەشقانداي مٸندەت جٷكتەمەي, جاۋاپكەرشٸلٸكتٸڭ بەرٸن جەكە باسىنا تاڭدى.
ەسسٸز قىز
قارسى بەتتەن تەڭٸز جەلٸ سوعادى. قوس ريكشا** شاڭعا وراعان, جان بالاسى جٷرمەيتٸن اۋىل جولىنىڭ باعىتى انىق. ول ەكٸنشٸ اربادا. جارقىن سەتتەردٸ باستان ٶتكەرمەيتٸنٸن اڭعارسا دا, ساپارلاتۋعا نەگە سونشا ىنتىزار بولعانى تولعانتتى. سٶزسٸز, بۇل ماحاببات ەمەس... ولاي بولسا, نە? جاۋاپتان قاشۋ ٷشٸن: «قانداي جايت كەزٸكسە دە, بٸز تەڭبٸز» دەدٸ.
قىز بٸرٸنشٸ اربادا. قينايتىنى, كٸشٸ سٸڭلٸسٸ قىزعانىشتان ٶمٸرٸنە بالتا شاپقان.
- قولدان كەلەر قايران جوق...
ٶنە-بويىندا تەك حايۋاني قاسيەتتەرٸ عانا بار بيكەشتٸ كٶرسە, ىزاعا بۋلىعاتىن.
جاعاداعى قورىمداردىڭ ماڭىنان ٶتكەن تۇستا باقالشىقتاردان بوي كٶتەرگەن شارباقتىڭ ارعى جاعىندا قابٸر ٷستٸندە قاراۋىتقان قۇلپىتاستاردىڭ بەتٸندەگٸ كٶمەسكٸ عانا مٶلتٸلدەگەن سۋعا كٶز تاستاپ تۇرىپ, نەزٸك جٷرەكتٸ ىستىق سەزٸمٸندەي قورعاي الماعانى ٷشٸن قىزدىڭ كٷيەۋٸن جەك كٶرٸپ كەتتٸ.
بەيتانىس سۋرەتشٸ
جۋرنالدىڭ ەلەمٸشٸندەگٸ تۋشپەن سالىنعان ەتەشتٸڭ بەينەسٸن شەبەر بەرگەن سۋرەتشٸ تۋرالى سۇراستىرا باستادى.
اراعا اپتا سالىپ, ٶزٸ ٸزدەپ كەلگەن "قىل قالام شەبەرٸنەن" ەشكٸمنەن كٶرمەگەن پوەزييانى اڭعاردى. بۇل ٶمٸرٸندەگٸ ەڭ ەلەۋلٸ جايتتاردىڭ بٸرٸ. انىعىندا, كٶكٸرەگٸندە كٶمٸلٸپ جاتقان مٸنەزدٸ ارشىدى.
كٷزدٸڭ سۋىق ٸڭٸرٸ. قاتقىل جاپىراقتارى دٷرديٸپ, سالبىراعان ساباقتارى بوي جازعان جٷگەرٸنٸڭ جٷيكەلەرگە ۇقساس جٸڭٸشكە تامىرىن قۇرعاق توپىراقتىڭ جالاڭاشتاعانىنا قاراپ, سۋرەتشٸنٸ ويلادى...
دۇرىسىندا, بۇل پورترەت. جەڭٸل جارالانعان. جاڭالىعى قاپالاندىردى.
- كەش. Cوڭعى سەتتە عانا...
كەزدەسۋ
ىمىرت. الاڭ. بويىندا تولقىنىس. بيٸك عيماراتتارداعى جىلتىراعان تەرەزەلەردٸ كٷمٸس ٶڭدٸ اسپان جارق-جۇرق ەتكٸزەدٸ.
جاياۋجولدىڭ جيەگٸندە كٷتتٸ. قىز بەس مينۋتتان سوڭ كەلدٸ. جٷدەپ- جاداعان ول «شارشاپ-شالدىققانىن» ايتىپ, جىميدى. العاشقى كەزدەسۋ. قول ۇستاسىپ, تٷن قويىنىنا سٸڭگەن ساياباقتا سەرۋەندەدٸ. وسى سەتتٸ قايتادان ٶتكەرۋ ٷشٸن, جالعانداعىنىڭ بەرٸن تالاق ەتۋگە دايىن. كٶلٸك ٸشٸندە ٷزدٸككەن قىز الاقانىن ايمالاپ:
- «سٸز ٶكٸنبەيسٸز بە?», - دەدٸ.
- «جوق».
- «مەن دە ٶكٸنبەيمٸن, بٸراق...».
ٶزگەرٸستەردەن ادا ٶڭٸ بۇرىنعىشا... جٷزٸ ارايلانعان ايداي...
تولعاق
فۋسۋمانىڭ*** ٸرگەسٸندە اكۋشەر سەبيدٸ جۋىندىرۋدا. سۋ سابىن كٶزٸنە تيگەن سايىن تىجىرىنىپ, جىلاي بەرگەن شارانانىڭ يٸسٸ مۇرنىن جارعاندا اينالاسىن سورلى ساۋالدار كەزدٸ: «نەگە تۋىلدى? جارىق دٷنيەگە, بٷكٸل تٸرشٸلٸك تاۋقىمەتٸنە?.. تاعدىرى نەلٸكتەن دەل مەندەي ەكە بەردٸ?»
بۇل ونىڭ تۇڭعىش پەرزەنتٸ...
ستريندبەرگ
گٷلدەگەن انارلاردىڭ ورتاسىندا ماتسزيان**** ويناعان قىتايلارعا ەسٸككە سٷيەنگەن قالپى قارادى. بٶلمەسٸنە ورالىپ, ەلسٸز شامنىڭ جارىعىمەن «اقىماقتىڭ تەۋبەسٸن» وقىدى. ەكٸ پاراعىن تاۋىسپاستان-اق جٷزٸندە مىسقىلعا بٶككەن جىميىس جٷگٸردٸ.
ستريندبەرگ اشىناسىنا جازعان حاتىندا "ناقۇرىستىڭ" ٶتٸرٸگٸنەن ايىرماسى جوق جالعاندىققا بوي ۇرعان.
ەسكٸلٸك
ىعىرىن شىعارعان سىنعان بۋددالار, قۇدايلار, پىراقتار مەن لوتوستاردىڭ كەسٸرٸنەن بەرٸن ۇمىتتى. تٸپتٸ, "ەسسٸز قىزدى" بۇيىرتپاعان ٶزٸنٸڭ "باقىتتى" عۇمىرىن دا...
سپارتاندىق سالت
قۋىس كٶشەنٸ بويلاعان تٶبەسٸ اشىق اربادا "اي-ارۋىنىڭ" بولارىن مٷلدە كٷتكەن جوق. سىرت كٶزدەن سەسكەنٸپ, امانداسپادى دا...
- Cۇلۋ ەكەن, ە?!,- دەدٸ دوسى.
جول تابانىن تٸرەگەن كٶكتەمگٸ تاۋلارعا تەلمٸرٸپ:
- يە, ٶتە كٶركەم...
جان العىش
جارتىسى جارتاسقا ٸلٸنگەن قارا جول. ساسىعان سيىر جاپاسىنىڭ اراسىنان ٶتەردە كٷن قىزدىرعان ماڭدايىنان شىم-شىمداپ شىققان تەرٸن سٷرتتٸ. جاقىننان پٸسكەن ارپانىڭ حوش يٸسٸ تاناۋدى جارادى.
- ٶلتٸر, ٶلتٸر...
وسى سٶزدەردٸ ٸشتەي قايتالاي بەرگەنٸن بايقامادى. كٸمدٸ? ونىسى ٶزٸنە عانا ايان. سونداي جەكسۇرىن, شاشىن تىم قىسقارتىپ قيعان كەززاپتى ەسٸنە الدى...
سارعايعان ارپا ەگٸستٸگٸنٸڭ شەتٸندە كاتوليك حرامىنىڭ كٷمبەزٸ تۇر.
قالىپ
تەمٸر قۇمىراعا ويىلعان ۇساق ەشەكەيلەر الدىنا "پٸشٸن" ەلەمٸنٸڭ ەدەمٸلٸگٸن ەكەلدٸ.
جاۋىن
تٶسەكتەن تۇرماستان سىر شەرتٸستٸ. جاتىن بٶلمەنٸڭ تەرەزەسٸنەن تامشى سىرعانايدى. جاڭبىر سالعان جايسىزدىقتان گٷلدەر سولعىن تارتتى. كەربەز ٶڭٸ باياعىشا... اي نۇرىنا تويعان...
ەڭگٸمەنٸڭ اۋانى بۇزىلعان. تەمەكٸ تٷتٸنٸنە ەلتٸپ, ەتپەتٸمەن جاتقان ول جانىنداعى جانمەن جەتٸ جىل بويى كەزدەسٸپ كەلگەنٸن ويلادى.
"مەن ونى سٷيەم بە?". جاۋابى دا توسىن: "ەلٸ دە سٷيەم!"
ۇلى جەر سٸلكٸنٸسٸ
قارا كٷيٸكتٸڭ ٷستٸندەگٸ ٷيٸلگەن, كٷنگە قاقتالعان ٶلٸكتەر ىلبىراعان ٶرٸكتەي. مەيٸت يٸسٸ كٷتكەنٸندەي جاعىمسىز بولماي شىقتى. جانسىز تەندەرگە تولى توعاننىڭ تٷرٸنە "سۇمدىق" دەپ باعا ايتۋ ەشقانداي اسىرا سٸلتەۋ ەمەس. ون ەكٸ-ون ٷش جاسار جەتكٸنشەكتەردٸڭ دەنەسٸنە قوماعايلانا قاراپ, ٶلگٸسٸ كەلٸپ كەتتٸ. شەيٸتتەردەن اجالدى قىزعاندى. «جاقسى ادام قۇدايعا دا كەرەك». «تەڭٸر كٸمدٸ سٷيسە, سونى ەرتە الادى.»
ٷلكەن ەپكەسٸ مەن ٶگەي اعاسىنىڭ باسپاناسىن ٶرت جالماعان. جەزدەسٸن جالعان سٶزٸ ٷشٸن سوتتاعان...
- ٶمٸرەم قاپقىرلار-اي!
وقيعا ورنىنداعى ونى وسىنداي كٸسەپٸر ويلار جەگٸدەي جەدٸ.
جانجال
بوستاندىقتان الشاقتاتىپ, قۇقايعا بٶكتٸرٸپ, بٸر-بٸرٸنە كەسٸرٸن تيگٸزگەن ولار جۇدىرىقتاستى. تۋىستارىنان «ٸنٸڭنەن ٷلگٸ ال!» دەگەندٸ ىلعي ەستۋدەن مەزٸ بولعان ٶگەي اعاسىنىڭ ٶكٸنٸشٸ - تٶبەلەسكە سەبەپ. بۇعان سالسا, بەرٸبٸر...
جاڭبىرلى اسپان استىنداعى جانجالعا كۋە گالەرەيانىڭ ارتىنداعى ساياباقتا مازداعان قىزىل سيرەننٸڭ بٷر جارعان بۇتاعى – جٷرەگٸندە مەڭگٸ ساقتالعان سۋرەت...
كولوريت
وتىز جاستا... الدانىشى - cىنعان جابىنعىش شاتىرلار مەن بەتٸن مٷك باسقان كٸرپٸشتەرٸ شاشىلعان الاقانداي الاڭقاي. بۇنداعى كەسكٸننٸڭ سەزانن پەيزاجىنان ەشقانداي ايىرماسى جوق.
ٶزارا ٷيلەسٸمدٸلٸك تاۋىپ, قىزىعۋشىلىعىن وياتقان تٷس پەن بوياۋدىڭ جەتٸ-سەگٸز جىل بۇرىن سىرىن ۇقپاعانى ەسٸندە.
جارناما قۋىرشاعى
ٶگەي ەكە-شەشەسٸ, سوسىن... اپاسىمەن بٸرگە جۇپىنى تٸرلٸگٸن اق پەن قارانىڭ اراسىندا جالعاستىرىپ جاتتى. ەۋروپالىق كٶيلەك دٷكەنٸندەگٸ قۋىرشاققا قاتتى ۇقسايتىنىن تٷيسٸگٸندەگٸ «مەنٸ» ەلدەبٸر ەڭگٸمەسٸندە جازدى. ...ٶكٸنٸشسٸز ٶلە سالاتىن ٶلەرمەن حەلدە ٶمٸر سٷردٸ.
دەلسالدىق
كٶك شٶپ قاۋلاپ ٶسكەن. قاسىندا ستۋدەنت.
- ٶمٸرگە ەڭ قۇشتار جاندار سٸزدەر شىعارسىزدار?!
- يە, سٸزدەر دە...
- ماعان ونىڭ اۋىلى الىس. مەندەگٸ - شىعارماشىلىققا دەگەن قۇمارلىق. بٸراق...
راسىندا, بويىنداعى بار قۇلشىنىسىن قاشان جوعالتقانى قاراڭعى.
- شىعارماشىلىققا دەگەن قۇمارلىق – ٶمٸردٸڭ ٶزٸ...
ٷنسٸز قالدى. قىزىل وت قۇسقان جانارتاۋعا قىزاعا دا, قىزعانا قارادى. نەگە ەكەنٸ بەيمەلٸم...
«حوكۋريكۋلٸك جان»
ويدا جوقتا جولىققان ەيەلدٸڭ تالانتىن ٶزٸمەن تەڭ سانادى. ونى «حوكۋريكۋلٸك جانى» مەن ليريكالىق ٶلەڭدەرٸ لاس ويىنان الىستاتتى. سودان سوڭ... اعاش بۇتاعىنداعى جالتىلداعان قاتتى قاردى قولمەن سٸلكٸپ تٷسٸرگەندەي ٶكٸندٸ...
جۇلقىنعان جەلدە قالقىعان قالپاق,
شاڭدى جولعا قۇلايدى.
تٷك كەرەگٸ جوق مەنٸ ەسٸركەۋدٸڭ,
جىلاعان سەنٸڭ جٷرەگٸڭ...
كەك
كٶكتەگەن تەرەكتەردٸڭ ورتاسىنداعى قوناقٷيدٸڭ بالكونىندا جىلاعان بالاسىن پاراقتى شيمايلاپ وتىرىپ جۇباتقان جەتٸ جىلدان بەرٸ جولىقپاعان «عاشىعىنىڭ» قييالي قىلىعىن "ەسالاڭ قىز" الاڭسىز شىلىمىن شەگٸپ قىزىقتادى.
اۋىر كٷرسٸنٸپ, پويىز بەن ەۋە كەمەسٸنٸڭ سۋرەتٸن سالدى. باقىتىنا وراي, بۇل پەرزەنت ٶزٸنەن ەمەس. قينايتىنى «كٶكە» سٶزٸن ەستۋ ەدٸ.
جاندارىنان سەبيدٸڭ الشاقتاۋىن پايدالانىپ, تەمەكٸسٸنٸڭ تٷتٸنٸن بوراتقان ەيەل كەكەسٸنمەن:
- سٸزگە ۇقسايدى ەمەس پە?
- مٷلدە! بٸرٸنشٸدەن...
- بۇل, بەلكٸم, قۇرساق كٶتەرگەن كەزٸمدەگٸ ەسەرٸڭٸز شىعار...
ٷندەمەي, كٶزٸن تايدىردى. اۋزىنا كەلگەنٸن وتتاعان قارسى الدىنداعى ادامدى ەرٸكسٸز تۇنشىقتىرعىسى كەلدٸ.
اينا
مەيرامحانا بۇرىشىندا بٸرگە وتىرعان دوسى سوڭعى كٷندەردەگٸ اۋا رايىنىڭ سالقىندىعىن ايتتى. ٷستەلدە پٸسكەن الما. سٶزٸ ۇناماعان سەرٸگٸنە كەيٸس تانىتىپ:
- سەن ەلٸ بويداق ەمەسسٸڭ بە وسى?!
- جوق, بٸر ايدان كەيٸن ٷيلەنەم.
ٷندەمەۋدەن باسقا شاراسى جوق. جانارى ەلدەكٸمنەن سەس كٶرگەنٸندەگٸدەي مىڭ قۇبىلعان جارداعى ايناداعى جٷزٸندە.
ديالوگ
- سەن نەگە قازٸرگٸ قوعامنىڭ قۇرىلىمىنا قارسىسىڭ?
- بويىندا كاپيتاليزمنەن تۋعان زۇلىمدىق بار.
- زۇلىمدىق? مەن سەنٸڭ جاقسىلىق پەن جاماندىقتىڭ ارا جٸگٸن اجىراتاتىنىڭا سەنگەم... ٶمٸر سٷرۋ سالتىڭ قالاي?
...ول وسىلاي دەنە تۇرقى بٶلەك پەرٸشتەمەن سٶيلەسەتٸن.
سىرقات
ۇيقىسىزدىققا شالدىقتى. قۋاتى قايتتى. ەر دەرٸگەر ەرتٷرلٸ جورامال جاسادى. اسقازاننىڭ تالاۋراۋى, ٸشەكتەردٸڭ ەلسٸرەۋٸ, ٶكپەنٸڭ قابىنۋى, جٷيكەنٸڭ جۇقارۋى, سوزىلمالى بۋىن اۋرۋى, ميدىڭ قالجىراۋى...
اۋرۋدىڭ قايدان جابىسقانى ٶزٸنە عانا ايان. بۇل - جانىن تٷسٸنبەگەننەن قوعام ٷشٸن جاساعان ٸسٸنٸڭ الدىنداعى ۇياتى.
كٷزدٸڭ بۇلتتى كٷنٸ... مەيرامحانادا تٸسٸنە تەمەكٸسٸن قىستىرىپ, گراممافوننان تىڭداعان ەۋەنٸنٸڭ ەسەرٸ بويىن بوساتتى. مۋزىكا توقتادى... كٷيتاباقتاعى جازۋدى وقىدى.
"Magis flute" - Mozart.*****
ونداعان ٶسيەتتٸ بۇزعان موتسارتتىڭ دەرتتٸ بولعانىن تٷسٸندٸ. دەل ٶزٸندەي مە?.. ۇنجىرعاسى تٷسٸپ, ورىندىعىنا بەت الدى.
قۇدايلار كٷلكٸسٸ
وتىز بەس جاستا... كٷن شۇعىلاسىنا شومىلعان قاراعاي ورمانىندا سەرۋەندەپ جٷر. ەسٸنە «قۇدايلار باقىتسىزدىعىنا وراي بٸز سەكٸلدٸ ٶزدەرٸنە قول جۇمساي المايدى» دەگەن ساناۋلى جىلدار بۇرىن جازعان سٶزٸ تٷستٸ.
تٷن
جاعاسى كٶپٸرشٸكتەنگەن دولى تەڭٸزدە ٸڭٸر جٷزٸپ جٷر. ەكٸنشٸ مەرتە ەيەلٸنٸڭ ساۋساعىنا نەكە جٷزٸگٸن كيگٸزدٸ. قۋانىشتى, ەرٸ ازاپتى... سۋ بەتٸندەگٸ نايزاعايعا قاراعان ٷش بالاسىنىڭ بٸرەۋٸن قۇشاعىنا قىسقان جارى جانارى جاسقا تولىپ:
- قايىق كٶرٸنە مە?
- يە.
- دٸڭگەگٸ سىنعان...
اجال
جالعىز كەشكەن تٷنٸن پايدالانىپ, بەلدٸگٸمەن تەرەزەنٸڭ تورىنا اسىلۋعا اسىقتى. ٸلمەككە موينىن سۇقسا دا, ٶزٸن ٶلٸمگە قيماۋى اجال الدىنداعى ازاپتان قايمىققاننان ەمەس... جاي عانا تەجٸريبە جٷزٸندە ٶلۋ ٷشٸن قانشا ۋاقىت كەرەكتٸگٸن ەسەپتەدٸ. جانى سەل قىسىلعاننان كەيٸن ەسەڭگٸرەدٸ. اقىرىن كٷتكەندە دەمٸ ٷزٸلەر ەدٸ. سوڭعى ساپارعا اتتانار الدىنداعى مەحناتى بٸر مينۋت جيىرما سەكۋندقا سوزىلاتىنىن ساعاتتىڭ تٸلٸ ايتتى.
ەينەكتەن تٶگٸلگەن قاراڭعىلىققا ەتەش شاقىرادى...
«ديۆان»
«Divan» جان دٷنيەسٸنە تاعى دا جٸگەر قۇيدى. وعان بەيتانىس «شىعىستىق گيوتەنٸڭ» قاتٸگەزدٸك پەن مەيٸرٸم اتاۋلىدان جوعارى تۇرعاندىعىن قىزعانىپ, تورىقتى. ييسۋس حريستوستان دا بيٸك قويدى. اقىننىڭ جٷرەگٸندە اكروپول مەن گولگوفا عانا ەمەس, اراب گٷلدەرٸ دە بٷر جارعان. ٸزٸنە ەرەر كٷش بار ما? اتالمىش كٸتاپتى اياقتاعان سوڭ, ٷرەيلٸ تولقىنىسىنان بويى بوساپ, ٶمٸردە قولىنان تٷك كەلمەگەن بٸرەۋ بولعانى ٷشٸن ٶز-ٶزٸن جەك كٶردٸ.
جالعان
جەزدەسٸنٸڭ سۋيتسيدكە بارۋى جىعىلعان ٷستٸنە جۇدىرىق. ەندٸ اپاسىنىڭ وتباسىن دا قامقورىنا الدى. بولاشاعى بۇلتتى كٷندەي بۇلىڭعىر. جانىنىڭ داعدارىسىن ٸشتەي كەلەمەج قىلسا دا, كٸتاپ وقۋىن توقتاتپادى. رۋسسونىڭ «تەۋبەسٸ» قولدان جاسالعان باتىرلىققا تولى. «جاڭا ٶمٸردەگٸ» ٶتٸرٸكتٸ سۋشا سٸمٸرەتٸن ەكٸجٷزدٸ كەيٸپكەرلەردٸ ەش جەردەن كەزدەستٸرمەگەن. فرانتسۋا ۆييوننىڭ «عاجاپ بۇقاسىن» عانا جاقىن تۇتتى.
دار اعاشىنا اسىققان شايىر بەينەسٸ تٷسٸندە مازاسىن الدى. قانشاما رەت ۆييون سيياقتى قۇردىمعا قۇلاعىسى كەلدٸ. بٸراق, ٶمٸر سٷرۋ داعدىسى مەن فيزيكالىق كٷشٸنٸڭ كٸنەراتىنىڭ ەسەرٸنەن قالاعانىنا جەتپەدٸ. بٸر كەزدەرٸ سۆيفت كٶرگەن شىڭدا شٸرٸگەن اعاشتاي ەلسٸرەدٸ.
ويىن
تاڭعى كٷننٸڭ سەۋلەسٸ سٷيگەن جٸڭٸشكە مۇزداي جٷزٸ بال-بۇل جاينايدى. تەنٸنە ساۋساعىنىڭ ۇشى دا تيمەگەن قىزعا ماحابباتسىز بايلانعان.
- سٸز اجال قۇشۋدى ارماندايسىز با?
- يە... جوق, ٶمٸردەن جالىققانىم سيياقتى, ٶلٸمگە ۇمتىلا المايمىن.
وسىدان كەيٸن ەكەۋٸ و دٷنيەگە بٸرگە اتتانۋعا سەرتتەستٸ.
- Piatonic suicidە?******
- Double platonic suicidە.*******
ونى ٶزٸنٸڭ سالقىنقاندىلىعى تاڭ قالدىرمادى.
ٶلٸم
سەرتكە سەلكەۋ تٷستٸ. قىزدىڭ پەكتٸگٸنە قول سۇقپاعاننان لەززات الۋى ارا- قاتىناستارىنا زالالىن تيگٸزبەدٸ. سارى مايداي ساقتاعان كٶگەرتكٸش قىشقىلىن بەرٸپ تۇرىپ: «بٸز وسىمەن كٷشتٸمٸز» دەدٸ.
راسىمەن, بۇدان وعان قۋات داريتىن. توقىلعان ورىندىقتىڭ ٷستٸندە ەمەننٸڭ جاس جاپىراعىنا قاراپ وتىرىپ, ٶلٸم سىيلايتىن تىنىشتىق پەن راحات جايلى ويعا شومدى...
تۇلىپ
سوڭعى كٷشٸ سارقىلۋعا تايادى. ٶمٸربايانىن جازامىن دەپ شەشتٸ. ول وڭاي ەمەس ەكەن. وڭاي بولمايتىن سەبەبٸ: كٷدٸك پەن ساقتىققا مالشىنعان ٶركٶكٸرەكتٸگٸنەن ٶز-ٶزٸن جەڭە المادى. «ەگەر ادامنىڭ بەتپەردەسٸن سىپىرساق, استىنان دەل سونداي بەتپەردە شىعادى». بٸر جاعىنان وسى پٸكٸر جانىن شىرمادى.
«پوەزييا مەن شىندىق» ٶمٸردەرەك اتاۋلىنىڭ باستاۋ بۇلاعىنداي. كٶركەم شىعارمانىڭ ايتارىن كٸم كٶرٸنگەننٸڭ تٷسٸنۋٸ مٷمكٸن ەمەسٸ ايدان انىق. شىعارماسى ٶزٸ سەكٸلدٸ عۇمىر كەشكەندەرگە عانا ەسەر ەتپەك...
بٸر بايلامعا توقتادى.
جەكە «پوەزييا مەن شىندىعىن» جازۋعا قۇمارتتى.
«ناقۇرىستىڭ ٶمٸرٸن» باستاعاندا, ەسكٸ-قۇسقى زاتتاردى ساتىپ الۋشىنىڭ دٷڭگٸرشەگٸندە اققۋدىڭ تۇلىبى تۇردى. باسى كٶتەرٸلگەن قۇستىڭ كٷيٸپ كەتكەن قاناتى سارعايعان. بٷكٸل عۇمىرى كٶز الدىنا كەلٸپ, تاماعىنا اششى ٶكسٸك كەپتەلدٸ. ونى ەسٸنەن اداسۋ, يا ٶلٸم كٷتتٸ...
جالعىزدىق. تٷنەك تۇنعان تار كٶشە. ٶزٸنٸڭ تٷبٸنە جەتەر سەتتٸ توسۋدى ۇيعاردى.
تۇتقىن
ەسٸنەن اداسقان قالامداس دوسىنىڭ جايناعان كٷلكٸگە جاسىرعان جالعىزدىعىن ۇعىندى, ۇناتتى... ٶيتكەنٸ, بولمىسى بٶلەك, بەزبٸرەۋلەر سيياقتى مەيمٶڭكەلەمەيدٸ.
جاعدايىن سۇراي بارعاندا «عاسىر سوڭىنىڭ» ەزەزٸلٸ ەلدەنەدەن قىمسىنعانداي داۋىسىن بەسەڭدەتٸپ «بٸزدٸ جىن يەكتەگەن» دەگەن جولداسى ەكٸ-ٷش كٷننەن كەيٸن كەزدەسكەندە راۋشان جاپىراقتارىن شايناپ جٷردٸ...
ٶزٸنە سىيلانعان سازدان ٸستەلگەن مٷسٸن جىندىحانادا جاتقان جاننىڭ جاقسى كٶرەتٸن جازۋشىسى, «رەۆيزوردىڭ» اۆتورىنىڭ كەۋٸتٸ بولاتىن. گوگول دا اقىلىنان اداسىپ ٶلگەن. ەكەۋٸنٸڭ تاعدىرلارىنا بٸر كٷش دارىعان.
...ەبدەن دىمى قۇرىعان ول راديگەنٸ وقىدى. «تەڭٸردٸڭ جاۋىنگەرلەرٸ ماعان قاراي بەتتەدٸ». قۇدايلاردىڭ كٷلكٸسٸن تاعى ەستٸدٸ. ٶزٸنٸڭ جوققا ناناتىن كٷيرەۋٸك كٶڭٸلٸمەن كٷرەستٸ. بٸراق, وعان قارسىلىق كٶرسەتۋ فيزيكالىق تٷردە مٷمكٸن بولمادى. جاۋىز ەزەزٸل جانىن شىنىمەن يەمدەنٸپ العان. جاراتۋشىعا كٸرشٸكسٸز سەنگەن ورتاعاسىرلىق ادامداردىڭ ٶمٸرٸن قىزعاندى. كوكتو سەنبەگەن قۇدايعا, جەنە ونىڭ ماحابباتىنا يەك ارتاتىن حەلٸ جوق...
كٷيرەۋ
قاۋىرسىن ۇستاعان قولدارى ەرەكشە قالتىرايدى. اۋزىنان سٸلەكەيٸ اقتى. ۇيىقتاتاتىن دەرٸنٸ مٶلشەردەن تىس ٸشٸپ, سەل قالعىپ ويانعان ساناسى تٷسٸنٸڭ ەسەرٸنەن ساندىراقتامادى. ماساڭ كٷيٸندە جارتى-اق ساعات وتىردى.
...ايداي سىنىق, جۇقا سەمسەردٸڭ جٷزٸنە سٷيەنٸپ, عۇمىرىنا تٷسكەن كٶلەڭكەدەن قۇتىلماعان قالپى... اتتاندى!
ماۋسىم, 1927 جىل.
ورىس تٸلٸنەن اۋدارعان: مارلەن عيلىمحان, اقتٸلەۋ قالدىباي
ۇلت پورتالى
- ادام ٶمٸرٸ بودلەر جازعان ٶلەڭنٸڭ بٸر جولىنا دا تاتىمايدى - ەمٸرحان بالقىبەكتٸڭ اۋدارماسى.
- ريكشا - شىعىس جەنە وڭتٷستٸك ازييادا جۇمساق رەسسورلى, ەكٸ دوڭعالاقتى, جاياۋ ادام سٷيرەيتٸن جەڭٸل اربا.
- فۋسۋما – ٷلكەن بٶلمەنٸ بٶلۋ ٷشٸن پايدالانىلاتىن ەكٸ جاعىنان قاعاز جاپسىرىلعان اعاش جاقتاۋلى سىرعاناپ اشىلاتىن ەسٸك.
- ماتسزيان – تٶرت كٸسٸ وينايتىن قىتايدىڭ قۇمار ويىنى
- "Magis flute" – Mozart – "عاجايىپ فلەيتا" – موتسارت.
- Piatonic suicidە? – ناقتى ماقساتى جوق سۋيتسيد?
- Double platonic suicidە – ەكٸ ەسەلەنگەن ناقتى ماقساتى جوق سۋيتسيد.
