اقتٶبە وبلىسى, العا اۋدانى, بەستاماق اۋىلىنىڭ تۇرعىندارى ٸرگەدەن قۇم تاسىعان كەسٸپورىن جۇمىسىنا قارسى شىقتى, دەپ حابارلايدى قازاقپارات.
«ەلەك ٶزەنٸنەن مال سۋ ٸشەدٸ, سۋارمالى ەگٸن شارۋاشىلىعىنا پايدالانامىز. قۇم تيەگەن جۇمىسشىلار ٶزەننٸڭ اعىسىن ٶزگەرتٸپ جٸبەردٸ. سۋ قۇرىپ كەتۋدٸڭ از-اق الدىندا تۇر. تابيعاتتى قورعايتىن, بٸزگە جانى اشيتىن ادام كەرەك. قۇمدى تەمٸرجول ماڭىنا تاسىپ جاتىر. ٷش جىل بولدى. اتىراۋ مەن اقتاۋعا جٸبەرٸپ جاتقان سەكٸلدٸ»,- دەدٸ اۋىل تۇرعىنى دينا مايقاراەۆا.
كومپانييا اۋىل ماڭىنداعى كارەردەن جىلىنا 2 مىڭ توننا قۇم ٶندٸرەدٸ.
تۇرعىن ٷي قۇرىلىسى, جول جٶندەۋ جۇمىستارىنا قاجەتتٸ شيكٸزاتتى شىن مەنٸندە اقتٶبە مەن اتىراۋعا جٶنەلتٸپ جاتىر.
«العا اۋدانى, بەستاماق اۋىلىندا تۇرامىن. تابيعات بٸر-بٸرٸنە بايلانىستى. قۇم, تال, سۋ. قۇم تازارتۋ قۇرالى بولسا, اعاشتى سورعى دەپ ايتار ەدٸم. اعاش كەتسە سۋ كەتەدٸ, ٶزەن اعىسى بۇزىلسا يٸرٸم پايدا بولادى. ال يٸرٸمگە تٷسكەن ادام دا, مال دا امان شىقپايدى. تاياۋدا بٸر بالا كٶز جۇمدى. سۋسىز قالامىز دەپ قورقامىز», - دەدٸ اۋىل تۇرعىنى قالىباي كٶزدٸباەۆ.
اۋىل تۇرعىندارى ٶزەن ماڭىنىڭ قازٸرگٸ حەلٸن بەينەكامەراعا تٷسٸرٸپ, بٸراز ماتەريال جيناقتادى. تيٸستٸ ورگاندارعا ارىزىن دا جازعان.
«ەلەك ٶزەنٸنٸڭ جولىن بۇزدى. اعاشتى كەسٸپ تاستادى. بەيٸتتٸڭ جانىن قازىپ, تەرەڭدٸگٸن 15-20 مەترگە جەتكٸزدٸ. اۋىل ٷشٸن بۇل ورنى تولماس ٶكٸنٸش. مەملەكەتتٸك ورگانداردان جاۋاپ الا الماي وتىرمىز. تالاپ بويىنشا كارەر ورتالىعى اۋىلدان 5 شاقىرىم بولۋى تيٸس. ال بٸزدە 3 شاقىرىمعا جەتپەيدٸ. ٷش جىل بويى ەشكٸم نازار اۋدارمادى, ەشكٸم كەلمەيدٸ. ەكولوگييالىق اپاتتى قولدان جاساپ وتىرمىز», - دەيدٸ اۋىل تۇرعىنى نۇربەك جۇبانقوسوۆ.
ال اقتٶبە وبلىستىق ەكولوگييا دەپارتامەنتٸنە العا اۋداندىق پوليتسييا بٶلٸمٸنەن ٷش ٸس تٷستٸ.
«پگس» جشس-ٸنە قاتىستى ماتەريالدا ەكولوگييالىق زاڭبۇزۋشىلىقتار تۋرالى جازىلعان. ٸس ينسپەكتورعا بەرٸلدٸ. كەيٸن تەكسەرۋ جٷرگٸزٸلەدٸ. نەگٸزٸ قۇم ٶندٸرۋگە قاتىستى سۇراقتا رۇقسات قۇجاتتى ەكولوگييا دەپارتامەنتٸ بەرمەيدٸ. سوندىقتان قازٸر بٸز مينيسترلٸك پەن پروكۋراتۋرادان جاۋاپ كٷتٸپ وتىرمىز»,- دەيدٸ وبلىستىق ەكولوگييا دەپارتامەنتٸ بٶلٸمٸنٸڭ باسشىسى عاسىر ورىنباساروۆ.
