Aqtóbe oblysy, Alǵa aýdany, Bestamaq aýylynyń turǵyndary irgeden qum tasyǵan kásiporyn jumysyna qarsy shyqty, dep habarlaidy QazAqparat.
«Elek ózeninen mal sý ishedi, sýarmaly egin sharýashylyǵyna paidalanamyz. Qum tiegen jumysshylar ózenniń aǵysyn ózgertip jiberdi. Sý quryp ketýdiń az-aq aldynda tur. Tabiǵatty qorǵaityn, bizge jany ashityn adam kerek. Qumdy temirjol mańyna tasyp jatyr. Úsh jyl boldy. Atyraý men Aqtaýǵa jiberip jatqan sekildi»,- dedi aýyl turǵyny Dina Maiqaraeva.
Kompaniia aýyl mańyndaǵy karerden jylyna 2 myń tonna qum óndiredi.
Turǵyn úi qurylysy, jol jóndeý jumystaryna qajetti shikizatty shyn máninde Aqtóbe men Atyraýǵa jóneltip jatyr.
«Alǵa aýdany, Bestamaq aýylynda turamyn. Tabiǵat bir-birine bailanysty. Qum, tal, sý. Qum tazartý quraly bolsa, aǵashty sorǵy dep aitar edim. Aǵash ketse sý ketedi, ózen aǵysy buzylsa iirim paida bolady. Al iirimge túsken adam da, mal da aman shyqpaidy. Taiaýda bir bala kóz jumdy. Sýsyz qalamyz dep qorqamyz», - dedi aýyl turǵyny Qalybai Kózdibaev.
Aýyl turǵyndary ózen mańynyń qazirgi hálin beinekameraǵa túsirip, biraz material jinaqtady. Tiisti organdarǵa aryzyn da jazǵan.
«Elek ózeniniń jolyn buzdy. Aǵashty kesip tastady. Beiittiń janyn qazyp, tereńdigin 15-20 metrge jetkizdi. Aýyl úshin bul orny tolmas ókinish. Memlekettik organdardan jaýap ala almai otyrmyz. Talap boiynsha karer ortalyǵy aýyldan 5 shaqyrym bolýy tiis. Al bizde 3 shaqyrymǵa jetpeidi. Úsh jyl boiy eshkim nazar aýdarmady, eshkim kelmeidi. Ekologiialyq apatty qoldan jasap otyrmyz», - deidi aýyl turǵyny Nurbek Jubanqosov.
Al Aqtóbe oblystyq ekologiia departamentine Alǵa aýdandyq politsiia bóliminen úsh is tústi.
«PGS» JShS-ine qatysty materialda ekologiialyq zańbuzýshylyqtar týraly jazylǵan. Is inspektorǵa berildi. Keiin tekserý júrgiziledi. Negizi qum óndirýge qatysty suraqta ruqsat qujatty ekologiia departamenti bermeidi. Sondyqtan qazir biz ministrlik pen prokýratýradan jaýap kútip otyrmyz»,- deidi oblystyq ekologiia departamenti bóliminiń basshysy Ǵasyr Orynbasarov.
