سامارا-شىمكەنت تاسجولىندا جەڭٸل كٶلٸك اۋدارىلىپ, جەتٸ ادام اۋرۋحاناعا تٷستٸ. بٸر جولاۋشى كٶز جۇمدى, دەپ حابارلايدى "ۇلت اقپارات".
وقيعا ساعات 07:30-دا بولدى. سامارا-شىمكەنت تاسجولىنىڭ 1053 شاقىرىمىندا, ياعني, ىرعىز اۋدانىنىڭ قالىباي اۋىلى ماڭىندا «تويوتا الفارد» كٶلٸگٸنٸڭ جٷرگٸزۋشٸسٸ رٶلگە يە بولا الماي قالعان. سالدارىنان كٶلٸك اۋدارىلىپ, وقيعا ورنىندا بٸر جولاۋشى كٶز جۇمدى. تاعى التى جولاۋشى مەن جٷرگٸزۋشٸ ىرعىز اۋداندىق اۋرۋحاناسىنا جەتكٸزٸلدٸ. بەرٸ - قىرعىزستان ازاماتى.
«قازٸر جول-كٶلٸك اپاتى كەزٸندە زارداپ شەككەن ازاماتتار اۋرۋحاناعا جەتكٸزٸلدٸ. تەرگەۋ باستالدى. وبلىستىق پوليتسييا دەپارتامەنتٸ شەتەل ازاماتتارىنا جول ەرەجەسٸن ساقتاۋدى ەسكەرتەدٸ. سەبەبٸ ٸرٸ حالىقارالىق تاسجولدا جيٸ جول اپاتى تٸركەلدٸ. مەسەلەن, 26 تامىزتا سامارا-شىمكەنت تاسجولىندا «لادا-21703» كٶلٸگٸ جٷك ماشيناسىمەن سوقتىعىسىپ قالدى. نەتيجەسٸندە جەڭٸل كٶلٸكتٸڭ 22 جاستاعى جٷرگٸزۋشٸسٸ اۋرۋحانادا كٶز جۇمدى», - دەدٸ وبلىستىق پد باسپاسٶز قىزمەتٸنٸڭ جەتەكشٸسٸ ەربولات سارقۇلوۆ.
ايتا كەتەيٸك, قىرعىزستان كٶلٸگٸ اۋدارىلىپ قالعان قالىباي اۋىلى ماڭىندا ٶتكەن جىلى 52 ٶزبەكستان ازاماتى جانىپ كەتكەن بولاتىن.
