اقتاۋدا كەمەلەتكە تولماعان قىزبەن جىنىستىق قاتىناستا بولعان كاراتە-دو جاتتىقتىرۋشىسىنا قاتىستى سوت ٷكٸمٸ شىقتى, دەپ حابارلايدى "ۇلت اقپارات".
ماڭعىستاۋ وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىنىڭ شەشٸمٸمەن باپكەر 14 جىلعا باس بوستاندىعىنان ايىرىلدى.
قىلمىستىق ٸس 8 مامىر كٷنٸ تٸركەلگەن بولاتىن. كاراتە-دودان جاسٶسپٸرٸمدەر جاتتىقتىرۋشىسى بولىپ قىزمەت اتقاراتىن ەر ادام الدىمەن, جەتكٸنشەك قىزدىڭ سەنٸمٸنە كٸرگەن. كەيٸن جاتتىقتىرۋشى رەتٸندە ىقپال ەتە وتىرىپ, ونىڭ ەركٸنەن تىس بٸرنەشە رەت جىنىستىق قاتىناسقا تٷسكەن. سوت بارىسىندا پروكۋرور سوتتالۋشىعا 15 جىل باس بوستاندىعىنان ايىرۋ جازاسىن تاعايىنداۋدى سۇرادى. جەبٸرلەنۋشٸ ٶكٸلٸ پروكۋرورمەن كەلٸستٸ. ال قورعاۋشى تاراپ سوتتالۋشىنىڭ ٸس ەرەكەتٸندە قىلمىستىق قۇرامنىڭ بولماۋىنا بايلانىستى اقتاۋدى سۇرادى. جاتتىقتىرۋشى ٶز كٸنەسٸن مويىنداعان جوق.
«سوتتا انىقتالعان جاعدايلارعا بايلانىستى جاتتىقتىرۋشى قر قك-نٸڭ 120-بابى 3-1 بٶلٸگٸ 1, 2-تارماقتارىمەن كٸنەلٸ دەپ تانىلىپ, وعان ٶمٸر بويىنا پەداگوگيكالىق, جاتتىقتىرۋشىلىق قىزمەتپەن اينالىسۋعا تىيىم سالۋمەن بٸرگە, 14 جىلعا باس بوستاندىعىنان ايىرۋ جازاسى تاعايىندالدى. سوت ٷكٸمٸ زاڭدى كٷشٸنە ەنگەن جوق»,- دەدٸ ماڭعىستاۋ وبلىستىق سوتى باسپاسٶز قىزمەتٸنٸڭ باسشىسى گاۋھار نۇرحانوۆا.
