بٷگٸن اقش-تا كوروناۆيرۋسقا قارسى ۆاكتسينا سىناعى باستالادى. بۇل تۋرالى اقش ٷكٸمەتٸنە سٸلتەي وتىرىپ, «امەريكا داۋىسى» حابارلادى.
سيەتلدەگٸ Kaiser Permanente Washington Health Research زەرتتەۋ ورتالىعىندا ٶتەتٸن سىناقتى اقش ۇلتتىق دەنساۋلىق ساقتاۋ ينستيتۋتتارى قارجىلاندىرادى.
سىناق 18 بەن 55 جاس ارالىعىنداعى, ٶز ەركٸمەن كەلٸسٸم بەرگەن 45 ساۋ ادامعا جاسالادى. ولارعا ۇلتتىق دەنساۋلىق ساقتاۋ ينستيتۋتتارى مەن Moderna كومپانيياسى جاساعان پرەپاراتتاردىڭ ەرتٷرلٸ دوزاسى ەگٸلەدٸ. ەرٸكتٸلەرگە اۋرۋ جۇقپايدى, ٶيتكەنٸ پرەپارات قۇرامىندا ۆيرۋس جوق. تەست ماقساتى - ۆاكتسينانىڭ قوسىمشا سالدارى قانداي ەكەنٸن انىقتاۋ. باستاپقى سىناقتان سوڭ اۋقىمدى سىناق باستالادى.
سەۋٸر ايىندا پەنسيلۆانييا ۋنيۆەرسيتەتٸ مەن كانزاس-سيتي سىناق ورتالىعىندا امەريكالىق Inovio Pharmaceuticals كومپانيياسىنىڭ كوروناۆيرۋسقا قارسى جاساعان ۆاكتسيناسى سىنالۋى مٷمكٸن. بۇل سىناققا دا ونداعان ەرٸكتٸ ادام تارتىلادى.
قازٸر ەلەمدە ونداعان زەرتتەۋ ينستيتۋتى كوروناۆيرۋس ينفەكتسيياسىنا قارسى ۆاكتسينا جاساۋمەن شۇعىلدانىپ جاتىر. بۇعان دەيٸن دٷنيەجٷزٸلٸك دەنساۋلىق ساقتاۋ ۇيىمى كوروناۆيرۋسقا قارسى العاشقى ۆاكتسينا كەم دەگەندە التى ايدان سوڭ پايدا بولۋى مٷمكٸن دەگەن ەدٸ. الايدا, اقپان ايىنىڭ سوڭىندا قىتايدىڭ رەسەيدەگٸ كونسۋلى ۆاكتسينا قازٸردٸڭ ٶزٸندە دايىن ەكەنٸن, بٸراق قوسىمشا تەكسەرٸس قاجەتتتٸگٸن مەلٸمدەگەن.
