© فوتو: U.S. Embassy Kyiv
اقش كونگرەسٸنٸڭ ٶكٸلدەر پالاتاسى لەند-ليز باعدارلاماسى بويىنشا ۋكرايناعا قارۋ-جاراق جەتكٸزۋ تۋرالى زاڭ جوباسىن ماقۇلدادى, - دەپ حابارلايدى Tengrinews.kz اگەنتتٸگٸ Gazeta سايتىنا سٸلتەمە جاساپ.
ۋكراينا مەن شىعىس ەۋروپانىڭ باسقا دا ەلدەرٸنە قورعانىس قۇرالدارىن بەرۋ مەحانيزمٸن جەڭٸلدەتۋدٸ كٶزدەيتٸن جوباعا كونگرەسسمەندەردٸڭ كٶپشٸلٸگٸ داۋىس بەرگەن. سەنات قۇجاتتى سەۋٸردٸڭ باسىندا ماقۇلداعان, ەندٸ زاڭ جوباسى قول قويۋ ٷشٸن اقش پرەزيدەنتٸ دجو بايدەنگە جٸبەرٸلەدٸ.
كونگرەسستٸڭ قوس پالاتاسى دا ماقۇلداعان لەند-ليز تۋرالى زاڭ ۋكرايناعا ەسكەري كٶمەك كٶرسەتۋدٸ جەڭٸلدەتۋگە ارنالعان. ول "قورعانىس تەحنيكاسىن بەرۋ بويىنشا پرەزيدەنت ٶكٸلەتٸنە قاتىستى تالاپتاردى ۋاقىتشا الىپ تاستايدى", دەلٸنگەن اقش كونگرەسٸ سايتىنداعى قۇجاتتا.
سوڭعى رەت امەريكالىقتار بۇل باعدارلامانى ەكٸنشٸ دٷنيەجٷزٸلٸك سوعىس كەزٸندە كەڭەس ەسكەرٸنە كٶمەكتەسۋ ٷشٸن قولدانعان.
بۇعان دەيٸن اقش پرەزيدەنتٸ دجو بايدەن كونگرەسسكە ۋكرايناعا جاڭا كٶمەك رەتٸندە قوسىمشا 33 ميلليارد دوللار بٶلۋ تۋرالى ٶتٸنٸش جولداعان.
