اقساي قالاسىندا كٶپقاباتتى ٷيدٸڭ قابىرعاسىنا بەلگٸلٸ ەنشٸ باتىرحان شٷكەنوۆتٸڭ سۋرەتٸ سالىندى, دەپ حابارلايدى قازاقپارات.
اۋدان ەكٸمٸنٸڭ ورىنباسارى الپامىس كٶشكٸنباەۆتىڭ ايتۋىنشا, اتالمىش جەتٸ قاباتتى ٷي حالىقتار دوستىعى كٶشەسٸ بويىندا ورنالاسقان.
بۇدان بۇرىن جەڭٸستٸڭ 75 جىلدىعىنا وراي وسى كٶشەدەگٸ 9 قاباتتى ٷيدٸڭ قابىرعاسىنا كەڭەس وداعىنىڭ باتىرى, جازۋشى باۋىرجان مومىشۇلىنىڭ بەينەسٸ سالىنعان ەدٸ.
مۇنداعى ماقسات – ەل تاريحىندا ورىن الاتىن بەلگٸلٸ تۇلعالارعا قۇرمەت كٶرسەتۋ. بيىلعى مەرەيتويلارعا وراي مۋرال سالۋ يدەياسىن اۋدان ەكٸمدٸگٸ كٶتەرسە, جەرگٸلٸكتٸ كيوس كومپانيياسى قارجىلاي قولداۋ كٶرسەتتٸ.
«ەكٸ مۋرالدى دا Unicorns دەپ اتالاتىن ورالدىق قىز بەن جٸگٸت سالدى. قالانىڭ ورتالىق كٶشەلەرٸنٸڭ بويىندا تۇرعان بەينەلەردٸ شىڭعىرلاۋ اۋدانى مەن قاراشىعاناق كەنٸشٸنەن كەلەتٸن كٶپٸردەن تٷسكەندە, نەگٸزگٸ جولمەن كەلەتٸندەردٸڭ بەرٸ كٶرەدٸ. الداعى ۋاقىتتا بۇل ٸس جالعاسىن تاۋىپ, بۇيىرسا, ۇلى اقىنىمىز ابايدىڭ بەينەسٸ دە اسقاقتاپ تۇراتىن بولادى», دەدٸ الپامىس كٶشكٸنباەۆ.
