اق ٷي اقش پرەزيدەنتٸ دجو بايدەن مەن رەسەي پرەزيدەنتٸ ۆلاديمير پۋتين اراسىنداعى سامميت 16 ماۋسىمدا جەنەۆادا ٶتەتٸنٸن حابارلادى. ماۋسىمدا بايدەن پرەزيدەنت رەتٸندە ەۋروپا ەلدەرٸنە العاشقى ساپارىنا شىعادى.
بايدەن مەن پۋتين پرەزيدەنت رەتٸندە العاش رەت كەزدەسپەك. ەكەۋٸ 2011 جىلى مەسكەۋدە جولىققان. ول كەزدە بايدەن – باراك وباما ەكٸمشٸلٸگٸندە ۆيتسە-پرەزيدەنت, پۋتين – رەسەي پرەمەرٸ ەدٸ.
24 مامىردا بەلگٸلٸ بولعانداي, اقش پرەزيدەنتٸنٸڭ ۇلتتىق قاۋٸپسٸزدٸك جٶنٸندەگٸ كەڭەسشٸسٸ مەن رەسەي قاۋٸپسٸزدٸك كەڭەسٸنٸڭ باسشىسى نيكولاي پاترۋشەۆ سٶيلەسكەن. ەكٸ جاقتىڭ بٸرلەسكەن مەلٸمدەمەسٸندە ەكٸ پرەزيدەنتتٸڭ كەزدەسۋٸنە ماڭىزدى قادام جاسالعانى ايتىلعان. قۇجاتتا ۆاشينگتون مەن مەسكەۋ قارىم-قاتىناستى رەتتەۋگە مٷددەلٸ ەكەنٸ دە جازىلعان.
سەۋٸردە بايدەن پۋتينمەن تەلەفونمەن سٶيلەسكەندە كەزدەسۋدٸ ۇسىنعان.
ناۋرىزدا بايدەن جۋرناليستٸڭ "پۋتيندٸ كيللەر دەپ سانايسىز با?" دەگەن ساۋالىنا "يە, سولاي ويلايمىن" دەپ جاۋاپ بەرگەن ەدٸ. وسىدان سوڭ مەسكەۋ ۆاشينگتونداعى ەلشٸسٸن كەڭەسۋ ٷشٸن كەرٸ شاقىرىپ العان. ال مەسكەۋدٸڭ قىسىمىنان كەيٸن اقش ەلشٸسٸ دە رەسەيدەن كەتكەن.
