سۋرەت: اشىق دەرەككٶزدەن
اباي وبلىستىق بٸلٸم باسقارماسى جارما اۋدانىندا اسىلىپ قالعان وقۋشىنىڭ سىنىپتاسى دا سۋيتسيد جاساعانى جايلى اقپاراتتىڭ شىندىققا جاناسپايتىنىن مەلٸمدەدٸ, دەپ حابارلايدى قازاقپارات پورتالى.
جارما اۋدانى ٷشبيٸك اۋىلىندا 15 جاستاعى وقۋشى اسىلىپ قالعان بولاتىن. باق-تا جەنە ەلەۋمەتتٸك جەلٸدە ونىڭ سىنىپتاسى دا سۋيتسيد جاساماق بولعانى, الايدا دەر كەزٸندە قۇتقارىلعانى جايلى اقپارات تارادى. بٸراق وبلىستىق بٸلٸم باسقارماسىنىڭ مەلٸمەتٸنە سٷيەنسەك, ول ٶز ٶزٸنە قول جۇمساماعان.
«بۇل - جالعان اقپارات. ەكٸنشٸ بالا جاي عانا ساباقتان قاشىپ كەتكەن. مەكتەپكە كەلمەگەن سوڭ ونى سىنىپ جەتەكشٸسٸ ٸزدەدٸ. بٸردەن بالانىڭ ٷيٸنە بارعان. اتا-اناسى دا بالاسىن ٸزدەپ, قوراعا كٸرگەندە ول سول جەردە شوكولاد جەپ وتىرعان», - دەيدٸ باسقارما باسشىسىنىڭ ورىنباسارى ەسەم نٷسكەنوۆا.
ونىڭ ايتۋىنشا, اتالمىش فاكتٸ بويىنشا جارما اۋدانىنىڭ قۇقىق قورعاۋ ورگاندارى تاراپىنان تەرگەۋ جۇمىستارى جٷرگٸزٸلۋدە.
«وقيعا بولعان كٷنٸ اۋدان ەكٸمٸ ورىنباسارىنىڭ تٶراعالىعىمەن موبيلدٸ توپ قۇرىلدى. موبيلدٸ توپ ٷشبيٸك اۋىلىنا بارىپ, بٸلٸم بەرۋ ۇيىمىنداعى پروفيلاكتيكالىق جۇمىستىڭ جاي-كٷيٸنە تالداۋ جٷرگٸزدٸ. سونىڭ قورىتىندىسى بويىنشا مەكتەپ ديرەكتورى سوتقا دەيٸنگٸ تەرگەۋ امالدارى اياقتالعانشا قىزمەتٸنەن شەتتەتٸلدٸ, مەكتەپ پسيحولوگى مەن سىنىپ جەتەكشٸسٸ قىزمەتتەرٸنەن بوساتىلدى», - دەيدٸ ەسەم نٷسكەنوۆا.
