16 қазанда Маңғыстау облысы Жаңаөзен қаласында дәстүрлі садақ атудан тұңғыш республикалық чемпионат өтті, деп хабарлайды "Ұлт ақпарат".
Чемпионаттың мақсаты – дәстүрлі садақ ату өнерін насихаттау, яғни оны қазақтың ұлттық спорттық өнері ретінде дамыту.
Чемпионат Қазақстан Республикасының Ұлттық спорт түрлері қауымдастығы мен Дәстүрлі садақ ату федерациясының ұйымдастыруымен өтті.
Тұңғыш республикалық чемпионатқа Қазақстанның барлық өңірлерінен 170-ке жуық спортшы қатысты. Чемпионат жасөспірімдер (7-17 жас аралығы), жастар (18-24) және ересектер (+24) арасында өтті. Ерлер мен әйелдер категориясы бөлек.
Садақшылар 10 метрден 75 метрге дейінгі қашықтыққа арналған Олимп, Жамбы, Пута, Қырғыз (Орта Азия), Қазақ (Жамбы) деген нысана түрлері бойынша мергендік шеберліктерін сынасты.
Жалпы командалық есепте бірінші орынды Шымкент қаласының құрамасы еншілеп, 1 млн теңге көлемінде жүлдеақы алды. Екінші және үшінші орындарды Абай және Жетісу облыстарының командалары алды.
Жеке есепте әрбір форматта бір-бір жеңімпаздан анықталып, әрқайсысы 100 000 теңге көлемінде жүлдеақыға қол жеткізді.
Тұңғыш рет ұйымдастырылып отырған республикалық чемпионаттың жалпы жүлде қоры 9 750 000 теңгені құрады.
Садақ – бейбіт заманда аңшылықтың, жаугершілік заманда – қорғаныстың құралы болған. Ал 19 ғасырдан бастап садақ ату спорттық өнерге айналды. Биылдан бастап Қазақстанда дәстүрлі садақ ату спорт түрі ретінде ресми түрде бекітілді.
1751 рет оқылды
