Бүгін елімізде ҚР Парламенті Сенатының сайлауы аяқталды. Нәтижесінде жаңадан 16 сенатор сайланды. Сайлау заңнама талаптарына сәйкес өткізілді. Арыз-шағымдар түскен жоқ. 5 облыс әкімінің орынбасары сенатор болып сайланды. Бұл туралы бүгін ҚР Орталық сайлау комиссиясының хатшысы Бақыт Мелдешов мәлім етті, деп хабарлайды "Ұлт ақпарат" .
«Астана уақытымен 13-00-де жағдай бойынша 16 өңірде ҚР Парламенті Сенатының депутаттарына кандидаттарды сайлауда дауыс берудің алдын ала қорытындылары шығарылды. Алдын ала қорытынды бойынша Ақмола облысынан Дәурен Әділбеков, Ақтөбе облысынан Мұхтар Жұмағазиев, Алматы облысынан Нұрлан Қылышбаев, Атырау облысынан Ғұмар Дүйсембаев, Шығыс Қазақстан облысынан Дүйсенғазы Мусин, Жамбыл облысынан Абдалы Нұралиев, Батыс Қазақстан облысынан Нариман Төреғалиев, Қарағанды облысынан Рысқали Әбдікеров, Қызылорда облысынан Мұрат Бақтиярұлы, Қостанай облысынан Жеңіс Нұрғалиев, Маңғыстау облысынан Бақтыбай Шелпеков, Павлодар облысынан Нұржан Нұрсипатов, Солтүстік Қазақстан облысынан Ерік Сұлтанов, Оңтүстік Қазақстан облысынан Әлімжан Құртаев, Астана қаласынан Еділ Мамытбеков және Алматы қаласынан Динар Нүкетаева сенатор болып сайланды», - деді ол.
Сөз соңында ОСК хатшысы сайлаудың заң талаптары бойынша өткендігін атап өтті.
«Сайлауға 3291 таңдаушының 3165-і қатысты. Ол – 96,2%-ды құрайды. Сайлау науқанына қатысқан халықаралық байқаушылардың саны 172, шетелдік БАҚ өкілдерінің саны – 116. Барлығы 288 байқаушы. Сайлау науқаны ҚР Сайлау туралы заңнама талаптарына сәйкес өткізілді. Арыз-шағымдар осы уақытта дейін Орталық Сайлау комиссиясына түскен жоқ», - деп түйіндеді сөзін Бақыт Мелдешов.
Ал ҚР Орталық сайлау комиссиясының мүшесі Константин Петров өз кезегінде ең жоғары дауыс жинаған кандидаттардың қандай қызмет атқаратындықтарын айтып берді.
«Ең көп дауыс жинаған кандидаттардың арасында іс басындағы 4 сенатор, 2 облыс әкімінің бірінші орынбасары, 3 облыс әкімінің орынбасары, бір облыс орталығының әкімі, 1 облыстық мәслихаттың хатшысы, бір жоғары оқу орнының ректоры, саяси партиялардың 2 өкілі, 1 жеке сектор өкілі және 1 арнайы мемлекеттік органның өкілі бар», - деді Петров.
2752 рет оқылды
