20 шіл, 2022 сағат 18:16

Ұлыбританияда маймыл шешегін жұқтырғандар саны 2 мыңнан асты

Ұлыбритания маймыл шешегі ауруын тоқтату үшін 100 000 доза вакцина сатып алды. Ел бойынша ауру жұқтырушылар саны 2130 адамға жетті, олардың көпшілігі – Лондонда, деп хабарлайды ҚазАқпарат ABC News басылымына сілтеме жасап.

Британдық денсаулық сақтау агенттігі індет таралып жатқанын айтты. Ауруды көбіне дәстүрлі емес жыныстық бағыттағы ер адамдар жұқтырған.

Тек маймыл шешегін жұқтырған науқастарды емдейтін медицина қызметкерлері және ауруға шалдыққандармен байланыста болған адамдарға ғана вакцина салынатын.

Ұлыбритания билігі сонымен қатар жоғарыда аталған ерлердің жеке санатына да вакцинацияны ұсынып, екпе стратегиясын кеңейтті.

Агенттік осы айда вакцинаның алғашқы қосымша дозалары келеді, ал қалғаны қыркүйек айында жеткізіледі деп мәлімдеді.

Bavarian Nordic компаниясы шығарған вакцина шешек ауруын емдеуге арналған.

Оның маймыл шешегіне қарсы тиімділігі - шамамен 85%.