Фото: pexels.com
Түркі әлемінің ортақ әліпбиі қабылданды. Бұл туралы Түркі академиясы сайтында хабарланды.
"9-11 қыркүйегі аралығында Бакуде Халықаралық Түркі Академиясы мен Түрік тілі қоғамы бірлесіп ұйымдастырған Түркі әлемі ортақ әліпбиі комиссиясының үшінші отырысы нәтижелі өтті", - делінген хабарда.
Бұл маңызды жиынға түбі бір бауырлас елдерден Түркі мемлекеттері ұйымы тарапынан құрылған ортақ әліпби комиссиясының мүшелері қатысқан.
Жиынның негізгі мақсаты – екі жылдық бірлескен жұмыс нәтижесінде жинақталған білім мен тәжірибені пайдалана отырып, түркі тілдеріне ортақ әліпби үлгісін әзірлеу болды.
Жиын барысында ғалымдар алғаш рет 1991 жылы ұсынылған латын қаріпі негізіндегі "Ортақ түркі әліпбиі" жобасы жан-жақты қарастырды.
Комиссия мүшелері аталған жобаны жетілдіре түсуді көздейтін көптеген ұсыныстарға қатысты егжей-тегжейлі талқылаулар жүргізіп, қажетті қорытындылар жасады.
"Осы қажырлы жұмыстың нәтижесінде 34 әріптен тұратын ортақ түркі әліпбиі туралы ұсыныс бойынша келісімге қол жеткізілді. Әр әріп түркі тілдерінде кездесетін әртүрлі фонетикалық дыбысты білдіреді.
Бұл басқосудың осылайша табысты аяқталуын тарихи сәт ретінде бағалауға болады. Ортақ түркі әліпбиінің дамуы түркі халықтарының тілдік мұраларын сақтай отырып, өзара түсіністік пен ынтымақтастықты нығайта түсуге ықпал етеді", - делінген хабарда.
Халықаралық Түркі Академиясы мен Түрік тілі қоғамы түбі бір түркі мемлекеттерінің үкіметтері мен комиссия мүшелеріне осы үдеріске қосқан зор үлестері үшін ризашылығын білдірді.
"Барлық тиісті мекемелер ұсынылып отырған ортақ түркі әліпбиін жүзеге асыруға белсенді түрде қолдау көрсетуге шақырылады", - делінген хабарда.
922 рет оқылды
