Халықаралық Берлин кинофестивалінің «Форум» бағдарламасында Шәкен Айманов атындағы «Қазақфильм» түсірген «Ақын» фильмінің еуропалық тұсаукесері өтті, деп хабарлайды ҚазАқпарат.
Отандық туындыны продюсер Юлия Ким және актриса Гүлжан Түзелбаева таныстырды.
«Фильмнің тұсаукесеріне қатысып отырғанымызға өте қуаныштымыз. Режиссер Дәрежан Өмірбаев көрсетілімге қатыса алмады. Біздің фильм Тикток жайлаған дәуірде саф өнердің – поэзияның ешкімге де керек болмай қалғаны туралы баяндалады. Менің ойымша, шынайы өнерге берілген кейбір шығармашылық жандар бұл фильмде өздерін көре алады. Мен фильмдегі басты кейіпкердің образында режиссердің өзін көріп тұрғандаймын. Осы кинотуындының жарық көруіне атсалысуға мүмкіндік берген Дәрежан Өмірбаевқа алғысымды білдіремін», - деді Юлия Ким.
Қазақстандық кинотуынды Берлин кинофестивалі көрермендерінің ерекше қызығушылығын тудырған. Бұл көрсетілімге билеттер бірнеше күн бұрын сатылып кеткен екен. Тұсаукесерге келген қонақтардың арасында Дәрежан Өмірбаевтың шығармашылығымен бұрыннан таныс көрермендер де болды.
«Ақын» фильмі технологиялар дамыған қазіргі заманда өнердің қоғамда алатын орны туралы ой қозғап, поэзияға сұраныс азайған дәуірде ақынның күйініші туралы сыр шертеді. Қазақ халқының XIX ғасырдағы ең көрнекті ақындарының бірі Махамбет Өтемісұлының қилы тағдыры жайында ойға батқан басты кейіпкер нәзік жүректі ақындардың өмірі қашан да қиын болғанын түсінеді. Фильмнің сценарийі неміс жазушысы Герман Гессенің «Авторлық кеш» атты автобиографиялық әңгімесі желісімен жазылған. Фильмдегі басты рөлді «Жігіттер» тобының әншісі Ердос Қанаев сомдайды.
Еске сала кетсек, аталған фильм Токиода өткен халықаралық кинофестивальде алғаш көрсетіліп, Дәрежан Өмірбаев «Үздік режиссер» жүлдесімен марапатталған болатын.
Осымен 72-ші рет өткізіліп жатқан Халықаралық Берлин кинофестивалінің жеңімпаздары ақпанның 16-нда жарияланады.
858 рет оқылды
