18 қыр, 2019 сағат 12:14

Теннисші Зарина Дияс Осака турнирінің ширек финалына шыға алмады

Қазақстандық Зарина Дияс Осака WTA турнирінің ширек финалына шыға алмады, деп хабарлайды "Ұлт ақпарат" ҚазАқпарат агенттігіне сілтеме жасап.

Дүниежүзілік рейтингте 85-орында тұрған З.Дияс екінші айналымда осы жарыстың бесінші, әлемнің 16-ракеткасы, америкалық Мэдисон Киспен кездесті.

Тартысты өрбіген бірінші партияда есеп 6:5 болғанда, қазақстандық теннисші брейк жасай білді – 7:5.

Екінші партияда Зарина доп берген бірінші гейм ұзаққа созылып, Кис брейк жасап кетті – 1:0. Содан соң америкалық спортшы дес берген жоқ – 6:0.

Үшінші сетті бастаған З.Дияс бұл жолы қарсыласының брейк жасауына мүмкіндік бермеді. Үшінші геймде М.Кис брейк жасап, алға шыққанымен, Зарина сол бойда теңестірді – 2:2. Дегенмен америкалық теннисші сет барысында тағы бір брейкке қол жеткізіп, матчты жеңіспен аяқтай алды – 6:4.

Тартысты бәсеке 2 сағат 7 минутқа созылды.

М.Кис ширек финалда кезінде рейтингте көш бастаған, қазір әлемнің 15-ракеткасы, германиялық Анжелика Кербермен шеберлік байқасады.

Еске сала кетейік, бұдан бұрын Юлия Путинцеваның Осака турнирінің екінші айналымына шыққанын, Михаил Кукушкиннің Санкт-Петербор жарысын сәтті бастағанын, ал Елена Рыбакинаның Қытайдағы додада ұтылып қалғанын жазған болатынбыз.