Соңғы әңгімеші...

Осындай сəттерде Жəкеңді соңғы əңгімеші деп ойлағаным рас. Бірақ ол ойымды Бекен ағамен əңгімелескеннен кейін қайтып алғандай болып едім. Бір жылы Бекен ағаға арнайы барып əңгімелестім. Əңгіме Абай мен оның заманы жайлы болды.

Бекен аға "етектен шапса, төске озған, ертеден шапса, кешке озған" қас жүйріктей ерен көсілген еді сол жолы. Сол сапар қазақы əңгімеге қарық болып, марқайып қайтқан едім.

Қазақы əңгіме дегеннен шығады. Бұл заманда қазақы əңгімешілер азайды, еститін құлақ та кеміді. Əңгімешінің əсерлі əңгімесін тыңдаған адам құсадан - депрессиядан арылады. Бұрнағы қазақтың көңілін кір басса, есті əңгіме, асқақ əн, тəтті күй тыңдайтын. Сөйтіп көңіл кірін жуып қайтатын. Бұл күнде мұның бірі де қалмады. Эфир біткенді албасты басты, теледидарды жын-шайтан жайлады.

"Сөз сөзден шығады, сөйлемесе неден шығады" дейді қазақ. Бірақ сөзді сөзден шығару оңай емес. Ол ер данасының қолынан ғана келетін өзгеше өнер. Кейде көк езу бір мылжыңдарды əңгімеші деп əспеттеп жатамыз. Əңгімеші жоқ болған соң қайтеміз енді.

Осы жасыма дейін талай əңгімешіні тыңдадым. Сөйтіп жүріп əңгімеші болудың сырына да үңіліп көрдім. Сонда əңгімешілерге ортақ бірнеше қасиет болатынын байқадым. Соның ішінде əңгімешінің бойында болатын төрт қасиетті ерекше атап айтқым келеді. Бірінші: əңгімешінің "құлағының тесігі, кеудесінің есігі" болады, яғни құлақпен естігенін, көзбен көргенін ешқашан ұмытпайтын, жады өте мықты келеді жəне көрген білгенін "кеудесінің есігімен" естиді яғни жүрекпен тыңдап, көкейіне тоқып алады. "Кеудесінің есігі" жоқ, қарау ниет, томырық адам ешқашан əңгімеші бола алмайды.

Екінші қасиет: əңгімешінің - өзі əңгіме қылушы заманға, сол заманның аяулы тұлғаларына деген кіршіксіз махабаты.

Үшінші қасиет: жүрегіндегі елге, жерге деген сүйіспеншілігі. Мұндай қасиеті жоқ адам əңгімеші бола алмайды. Тәкаппар, менмен, өзімшіл, пайдакүнем адамнан əңгімеші шықпайды.

Төртінші: Жері əңгімеші болуы шарт. Жері əңгімешіл емес елдің ері əңгімеші бола алмайды.

Əңгімеші адам көңілі сəбидей таза, өшпенділіксіз (агрессиясыз), көп көріп, көп тоқыған, ең бастысы кемел парасат иесі болуы шарт.

Осы қасиеттердің барлығы Бекен ағада бар еді.

Бекен аға соңында "Ұлылар мекені" деген ғажайып шығарма жазып қалдырып кетті. "Ұлылар мекенімен" Бекен ағаның есімі ақырдың күніне дейін жасай бермек. Мұхтар Əуезовтің "Абай жолы" эпопеясы кең құлашты эпикалық көркемдігімен құнды болса, Абай жəне оның заманы суреттелген Бекен Исабаевтың "Ұлылар мекені" өзінің деректілігімен, таптық қайшылықтарсыз, азат көзқараспен жазылғанымен маңызды.

Биылғы жылы Абайдың 175 жылдығы, Бекен ағаның 90 жылдығы еді. Сол тойының төрінде Абай заманының елшісіндей болып, Бекен ақсақал отырады, сонда бəріміз абыз ақсақалға жапырлап сəлем беріп жатамыз, бұл да тойдың бір сəні болады деп қиялдап армандаушы едім. Кімнің дегені болып жатыр...

Бақұл бол, Бекен аға. Біз Сізді ұмытпаймыз! Нұрыңыз пейіште шалқысын!

Ерлан Төлеутайдың фэйсбуктағы жазбасынан