Сомалиде шөлдегі шегірткелердің қаптап кетуіне байланысты төтенше жағдай енгізілді, деп хабарлайды "Ұлт ақпарат" осы елдің Garowe жаңалықтар порталына сілтеме жасап.
Төтенше жағдайды Сомалидің Ауыл шаруашылығы министрлігі жариялады, елдің оңтүстік аудандарындағы жағдай ауыр.
Өз кезегінде, БҰҰ Азық-түлік және ауылшаруашылық ұйымы (FAO) соңғы күндері Сомали жағалауына түскен жел мен жаңбыр шөлдегі шегірткенің күрт көбеюіне жағдай жасағанын ескертті. «Жәндіктер басқа аудандарға тез таралуда, бұл - жерді өнімсіз қалдыру қаупін туындатып отыр», - делінген FAO мәлімдемесінде.
Африкандық шегіртке –жәндіктер түрінің ішіндегі ең қауіпті зиянкес. Құрғақшылық жағдайда аш қалу қаупі туындаса, бұлар саны ондаған миллионға жететін үлкен топ құрап, азық іздейді. Бұл жәндіктердің ордалары тәулік ішінде 150 шақырымға дейін жолды артта қалдырады, ал жолында кездескен өсімдіктің бәрін жеп, тып-типыл етеді.
1067 рет оқылды
_80_80.jpg)
