Фото: Niyet_derss парақшасынан
Қазіргі кезде жастар ұлттық киімді күнделікті киюі үшін сән әлемінде қандай киім үлгісі трендте, соған сәйкестендіріп, жастар қызығатындай, киюге ыңғайлы, минимализм үлгісінде тігу қажет деп есептейді Ult.kz тілшісі сұхбаттасқан дизайнер Гүлжан Ниетқабыл.
Гүлжан Ниетқабыл – Т.Жүргенов атындағы Өнер академиясын киім дизайны мамандығы бойынша бітірген. Содан бері киім дизайны аясында жұмыс істеп келе жатыр. 2004-2010 жылдар аралығында ұлттық киім тігетін «Ерке–Нұр» сән үйінде дизайнер болып жұмыс істеген. 2011 жылдан бастап жеке киім цехын ашып, содан бері ұлттық киімді дамытуға үлес қосып келеді. Осы жылдан бастап сахнада жүрген көптеген әртістердің, мәдениет үйлері мен театрларға сахналық киімдер де тігіп жүр.
Фото: Niyet_derss парақшасынан
Ал 2016 жылдан бастап қарапайым халықтың күнделікті киетін минимализм стилінде киім үлгілерін қолжетімді бағада жасауға тырысып келе жатыр. Ол қазақтың ұлттық киімдерін шетелде де көрсетіп жүр. Норвегия, Грузия, Дубай мен Әзербайжанда ұлттық киімдердің сән апталықтарында жұмыстарын көрсеткен.
Фото: Niyet_derss парақшасынан
«Жастарды қызықтыру үшін олардың еліктейтін әншілері, көз алдында жүрген блогерлер арқылы трендке енгізу керек»
Ол жуырда Ә.Қастеев атындағы өнер музейінде қазақтың ұлттық киімін халыққа дәріптеп, күнделікті киюге болатынын көрсетіп, таныту мақсатында өзінің жеке көрсетілімін өткізген.
Фотолар: Niyet_derss парақшасынан
«Менің ойымша, жастарға күнделікті ұлттық киімді кигізу үшін қазіргі уақытта сән әлемінде қандай киім үлгісі трендте, соған сәйкестендіріп, келтіріп, жастар қызығатындай, киюге ыңғайлы, минимализм үлгісінде жасаса киеді деп ойлаймын. Себебі, мен өзім сол бағытта жұмыс істеймін. Минимализм стилінде, күнделікті киюге арналған киімдер. Мен 2011 жылдан бері осы бағытта жұмыс істеп келе жатырмын. Салыстырса, жастар арасында осындай киім үлгілері көп сұранысқа ие. Қазір ұялмай киеді. Бұрын таңғалатын. "Күнде киюге бола ма, Наурызда кимей ме, сахнада кимей ме?" деген сияқты болатын. Ал қазіргі кезде, 2016 жылдан бері этно стиль трендке қатты кіргеннен бері жастардың сұранысы артты. Сол себепті, жастарды қызықтыру үшін олардың еліктейтін әншілері, көз алдында жүрген блогерлер арқылы трендке енгізу керек. Сол кезде олар үнемі киіп жүреді деп ойлаймын», – дейді дизайнер Гүлжан Ниетқабыл.
Фотолар: Niyet_derss парақшасынан
«Тіпті, бізде жіп те шықпайды»
Жалпы қоғамда көпшілік "ұлттық нақыштағы киімдердің бағасы неге қымбат?" деген сұрақты жиі қояды. Сұхбаттасымыз дизайнер Гүлжан Ниетқабылдың бұл сұраққа жауабы дайын екен.
«Өзім осы цехты ашқалы көптеген адамдар ұлттық нақышта киім алғысы келетінін көрдім. Бірақ кейбір адамдардың жағдайы, қалтасы көтере алмай жатады. Себебі, айналып келгенде, оның түбі – біздің мемлекетімізде шикізат жоқ. Шикізатты шетелден әкелеміз. Тіпті, бізде жіп те шықпайды. Негізгі матасын қойғанда, жіп пен түйме сияқты ұсақ-түйектің өзін шетелден аламыз. Соның бәрін шетелден әкелгеннен кейін, әрине матаның бағасы қымбатқа шығады. Сонымен қатар, бізде тігетін тігінші, қиятын қиюшы сияқты мастерлердің өзі жоқтың қасы. Кез келген тігін цехының проблемасы сапалы киім тігетін жұмысшы табу. Оның да бағаны қымбатқа сатуға әсер етеді. Өйткені, жұмысшы аз болғандықтан, бар жұмысшы қымбат сұрайды. Соның барлығын есептегенде, біздің тігіп жатқан киіміміздің құнына әсер етеді», – деп отыр дизайнер Гүлжан Ниетқабыл.
Фото: Niyet_derss парақшасынан
Айта кетейік, елімізде 18-ші наурыз «Ұлттық киім кию күні» деп бекітілген. Алайда соңғы жылдары ұлттық нақыштағы көйлек, шапан, кәжекей мен камзолды, сондай-ақ әшекей бұйымдарды мерекеде ғана емес, күнделікті тұрмыста жаппай кию сәнге айналды.
Ақбота Мұсабекқызы
Оқи отырыңыз : Мата Түркиядан, түйме Қытайдан: Ұлттық киім кию сәнге айналды, бірақ...
13198 рет оқылды
