© Sputnik / Aleksander Galperin
McDonald's Қазақстандағы жұмысын жандандырмақ. Бұл туралы Sputnik Қазақстан агенттігі хабарлады.
"Біз жұмысты жалғастыруды жоспарлап отырмыз. Компания – ірі жұмыс беруші, қазақстандық нарыққа жақында ғана енген брендті одан әрі дамытқымыз келеді. Қазіргі геосаяси жағдайлар бізге әсер етеді, өйткені біз – халықаралық брендпіз. Сондықтан біздің мақсатымыз – өз қызметімізді барлық талап пен процедураға сәйкес жалғастырып, әрі қарай дамыту", - деді "Food Solutions KZ" ЖШС (McDonald's Kazakhstan) бас директоры Әсет Машанов.
McDonald's Қазақстанға қатысты жағдай Cауда және интеграция министрлігінің техникалық реттеу және метрология комитеті мемлекеттік органдар, бизнес және ұлттық компаниялар өкілдерінің қатысуымен өткен онлайн отырыста талқыланған.
Атап айтқанда, тауарларды кедендік ресімдеуді жеделдету, сәйкестік сертификатын, ветеринариялық сертификатты алу мәселелері қаралған.
"Келесі аптадан бастап жыл соңына дейін алыс-жақын шетелден тауар қабылдаймыз. Өкінішке қарай, кедендік рәсімдеу процесі көп уақыт алады. Үрдісті барынша жеделдету қолдау көрсетуді сұраймыз. Жасыл дәліз, кеден және сертификаттау органдарынан құжаттарды жедел қабылдауы сынды шаралар бойынша қолдау қажет", - деді Әсет Машанов онлайн отырыста.
Өз кезегінде жергілікті өндірушілер McDonald's Қазақстанға өз өнімін жеткізуге дайын екенін атап өтті.
"Мен бірлесіп жұмыс істеуді ұсынар едім. Республикалық зертханаларда тексерістен өтіп, сапалы өнім жеткізе алатын өзіміздің құс фабрикалары бар. Логистика арзанырақ болар еді. Өндірушілерде барлық сертификаты бар", - деді Қазақстан құс өсірушілер одағының төрағасы Руслан Шәріпов.
"Қазақстанның сүт одағының" атқарушы директоры Владимир Кожевников кәсіпкерлер ынтымақтастыққа дайын деп отыр.
1180 рет оқылды
