03 нау, 2021 сағат 13:31

Қазақстанның жеті өңіріндегі жолдарда ауыр жүк көліктеріне шектеу енгізілді

Қазақстанның жеті өңіріндегі жолдарда ауыр жүк көліктеріне шектеу енгізілді, деп хабарлайды "Ұлт ақпарат" ИИДМ Көлік комитетіне сілтеме жасап.

Жыл сайын көктем уақытында қыс мезгілінен кейін жолдарды сақтау үшін бір осьтік жүктемесі 8 тоннадан асатын көліктердің жүруіне уақытша шектеу енгізілді. Бұл ережелер бірінші наурыздан бастап 7 облыстағы тас жолдарда қолданылып келеді.

«Бесінші жол-климаттық деп аталатын аймаққа» Алматы, Атырау, Жамбыл, Қарағанды (Жезқазған өңірі), Қызылорда, Маңғыстау және Түркістан облыстары кіріп отыр. Мұндағы уақытша шектеу 1 наурыз бен 1 сәуір аралығында сақталмақ.

Шектеу төтенше жағдайлардың алдын алу және жою жөніндегі іс-шаралармен айналысатын, жүктер мен жолаушыларды халықаралық тасымалдауды жүзеге асыратын, зардап шеккендерге гуманитарлық көмек көрсететін, азық-түлік, жолаушылар, жолжүк, дәрі-дәрмек тасымалдайтын, сондай-ақ, жол-құрылыс жұмыстарымен айналысатын көлік құралдарына қолданылмайды», делінген хабарламада.

23 наурыздан 1 мамырға дейін аталған шектеулер Ақмола, Ақтөбе, Шығыс Қазақстан, Батыс Қазақстан, Қарағанды (Жезқазған өңірі), Қостанай, Павлодар және Солтүстік Қазақстан облыстарында енгізілмек.