Қазақстанның допингке қарсы ұлттық орталығы анализдерінен тыйым салынған заттар табылғаны үшін дисквалификацияланған спортшылардың тізімін жариялады, деп хабарлайды Sputnik агенттігі.
Қазақстандық биатлоншы Кристина Боровикованың анализінен тыйым салынған препарат шықққан.
Боровикова допинг-сынаманы Қазақстанның жастар чемпионатында 25-ші орынды иеленген кезде, 2018 жылдың 26 желтоқсанында тапсырды. Спортшының қанынан мельдоний табылды.
Боровикова төрт жылға – 2019 жылдың 25 қаңтарынан 2023 жылдың 25 қаңтарына дейін жарыстардан шеттетілді.
Кристина Боровикова 2001 жылы Шығыс Қазақстан облысының Риддер қаласында туған.
2016 жылы WADA Ақмола облысынан шыққан спортшы Игорь Криворчукті анализдерінен мельдоний табылуына байланысты төрт жылға шеттеткен еді. 2017 жылы Азия чемпионатының, Универсиада мен Азиаданың күміс жүлдегері Анна Кистанова фуросемид үшін екі жылға дисквалификацияланды. Осыдан кейін Кистанова карьерасын аяқтады.
Мельдонийге неге тыйым салынған?
Мельдоний ағзадағы оттегінің сіңуін жеңілдетеді, сергітеді және жүрек жасушаларын әртүрлі жағымсыз әсерлерден қорғайды. Препарат жұмыс өнімділігін арттырады, психикалық және физикалық артық күш жұмсау белгілерін азайтады, төзімділікті арттыруға көмектеседі, оңалтуды жеделдетеді.
2016 жылдың 1 қаңтарынан бастап Дүниежүзілік допингке қарсы агенттік (WADA) мельдонийді тыйым салынған препараттар тізіміне енгізді, оны спортшыларға жарыс кезінде де, одан тыс уақытта да пайдалануға болмайды.
1313 рет оқылды
