03 мау, 2020 сағат 09:54

Қазақстанда АҚШ-тың әскери базасын салу талқыланып жатқан жоқ - Мемлекет басшысы

ҚР Президенті Қасым-Жомарт Тоқаев ресейлік басылым «Комсомольская правда» газетіне берген сұхбатында «Қазақстанда АҚШ әскери базасы пайда болуы мүмкін бе?» деген сұраққа жауап берді.

«Қазақстанда АҚШ-тың әскери базасын салу талқыланып жатқан жоқ және бұл мәселе күн тәртібінде тұрған жоқ. Сонымен бірге, Қазақстан мен Америка Құрама Штаттары арасындағы ынтымақтастық энергетика, инвестиция, технология сияқты стратегиялық салаларда табысты дамып келеді. Біз қарусыздану және ядролық қаруды таратпау мәселелері бойынша ұдайы байланыстамыз. Оған қоса, біз Алматыдағы бұрынғы обаға қарсы институт базасында биологиялық қауіпсіздік саласы бойынша да жұмыс істедік. Бірақ қазір келісімшарттың аяқталуына байланысты америкалықтар зертханадан кетіп, онда тек қазақстандық мамандар бюджет қаражаты есебінен жұмыс істейді. Осы саладағы зерттеулердің өзектілігін ескере отырып, біз ресейлік мамандармен де тығыз ынтымақтастық орнатуға дайынбыз», - деді Қасым-Жомарт Тоқаев.