Бүгін, 18 cәуірде футболдан Премьер-лига командалары арасындағы ел біріншілігінің алтыншы турында үш ойын өтті, деп хабарлайды "Ұлт ақпарат".
Алғашқы ойында «Тараз» өз алаңында Оралдың «Ақжайық» командасын жеңді. Кездесу тағдырын алаң иелері қатарынан 48-минутта Педро Эуженио соққан жалғыз гол шешті. Осылайша тараздықтар 1:0 есебімен жеңіске жетті. Аталған жеңісінен кейін «Тараз» турнир кестесінде 14 ұпаймен екінші орынға көтерілді.
Елордада «Астана» Қызылжардың «Қызылжар» командасын 3:1 есебімен тізе бүктірді. Кездесуде елордалық Абзал Бейсебеков 4-минутта есеп ашқан еді. Оған қызылжарлық командадан Әлібек Қасым 40-минутта бір голмен жауап берді. Одан кейін «Астана» сапынан Марион Томасов 65, Макс Эбонг 67-минуттарда гол соғып, қорытынды есепті белгіледі. Жеңісінен кейін елордалық клуб турнир кестесінде көш басына шықты.
Ал Қызылордада жергілікті «Қайсар» мен «Атырау» командалары 1:1 есебіне қанағат білдірді. Бұл ойында алаң иелерінен Каролис Лаукжемис 4-минутта есеп ашса, 83-минутта атыраулық Дмитрий Гузь таразы басын теңестірді.
Аталған турдағы қалған ойындар 19 сәуірде өткізіледі. Бұл күні «Жетісу» мен «Ордабасы», «Ақтөбе» мен «Шахтер», «Қайрат» пен «Тобыл», «Тұран» мен «Каспий» командалары кездеседі.
689 рет оқылды
