15 нау, 2021 сағат 22:27

Футболдан Чемпиондар лигасы: «Реал Мадрид» клубының әлеуеті қандай

Бүгін, 16 наурызда UEFA Чемпиондар лигасы 1/8 финалында қарымта ойындар басталады, деп хабарлайды "Ұлт ақпарат".

Алғашқы жұпта «Манчестер Сити» (Англия) пен «Боруссия Менхенгладбах» (Германия) командалары кездеседі. Алғашқы кездесуде ағылшындық клуб қарсыласынан 2:0 есебімен басым түсті.

Ойын елорда уақытымен 01.50-де басталып, «Qazaqstan» телеарнасынан тікелей эфирде көрсетіледі.

Командалар құрамында жарақат алған ойыншылар бар. «Манчестер Сити» сапынан шабуылшы Серхио Агуэро, қорғаушылар - Натан Аке мен Анхелиньо жасыл алаңға шығудан тыс қалды.

Ал «Боруссия Менхенгладбах» құрамынан жартылай қорғаушылар - Кристоф Крамер, Фамана Кизера, шабуылшы Хулио Вильяльба, қорғаушылар - Мамаду Дукуре, Рами Бенсебаини дәл осындай жағдайды басынан өткізіп отыр.

Екі команда бұған дейін аталған турнирде бес мәрте кездесті. Оның төртеуінде «Манчестер Сити» клубының мерейі үстем болса, біреуінде тең нәтиже тіркелді.

Тағы бір ойын «Реал Мадрид» (Испания) пен «Аталанта» (Италия) командалары арасында өтеді.

Екі команда арасындағы алғашқы ойында испандықтар 1:0 есебімен басым түсті.

Ойын елорда уақытымен 01.50-де басталып, «Qazsport» телеарнасынан тікелей эфирде көрсетіледі.

Кездесу алдында «Реал Мадрид» сапынан төрт футболшының алдағы ойынға қатысудан тыс қалғандығы белгілі болды.

Атап айтқанда, олардың қатарында Марсело, Альваро Одриосола, Даниэль Карвахаль, Мариано Диас сынды футболшылар бар.

Екі команда аталған турнирде биыл тұңғыш рет кездесті.

Естеріңізге сала кетелік, турнирдің ширек финалына «Ливерпуль» (Англия), «Пари Сен-Жермен» (Франция), «Боруссия Дортмунд» (Германия) және «Порту» (Португалия) командалары жолдама алды.