Қазақстан Республикасы Тәуелсіздігінің 30 жылдығы мен Түңғыш Президент күнін мерекелеу құрметіне Еуропаның ежелгі кинотеатрында «Жұлдыздар тоғысқанда» фильмінің көрсетілімі өтті, деп хабарлайды ҚазАқпарат.
Шараны Страсбург қаласындағы ҚР Бас консулдығы Франциядағы Қазақстан киносы кинофестиваль қауымдастығымен бірлесіп, 1913 жылдан бері жұмыс істеп келе жатқан «Одиссей» кинотеатрында ұйымдастырды.
Францияның Үлкен Шығыс аймағының және Страсбург қаласының ресми тұлғалары, Еуропа Кеңесінің өкілдері, Еуропа Парламентінің депутаттары, шет ел елшілері мен дипломаттары, француз студенттері мен журналистері Қазақстанның көпғасырлық даму тарихымен, қазақ мемлекетін қалыптастырудың маңызды кезеңдерімен танысты.
Бас консул Әнуарбек Ахметов өз сөзінде шетелдік қонақтарға осы кинофильмде ерекше көрсетілген Тәуелсіз Қазақстанның қалыптасуындағы Тұңғыш Президент – Елбасы Нұрсұлтан Назарбаевтың рөлі туралы айтып берді.
2019 жылғы маусымда сайланған Қазақстан Президенті Қасым-Жомарт Тоқаев қазіргі уақытта республиканың одан әрі демократиялық дамуына бағытталған ауқымды саяси және әлеуметтік-экономикалық реформалар жүргізіп жатқаны атап өтілді.
Сондай-ақ, қонақтар Қазақстанның тәуелсіздік жылдарындағы саяси, экономикалық және мәдени-гуманитарлық даму саласындағы жетістіктеріне арналған фотосурет көрмесімен танысты.
1109 рет оқылды
