Экология министрлігінің шұғыл желісіне алғашы жұмыс аптасында 376 арыз түскен. Бұл туралы "Ұлт ақпарат" министрліктің баспасөз қызметіне сілтеме жасап хабарлайды.
Заңсыз қоқыс орындары туралы хабардың басым бөлігі - Алматы (61) және Қарағанды (41) облыстарынан, сондай-ақ Алматы қаласынан (47) түскен. Азаматтардан келген өтініштердің саны бойынша «бестікке» Ақтөбе (35) және Шығыс Қазақстан (32) облысы кіреді. 376 шағымның 269-ы стихиялық қоқысқа қатысты, 107-сі толып кеткен контейнерлер туралы шағымдар.
«23 шілдедегі жағдай бойынша әкімдіктермен бірлесіп 132 қоқыс полигоны жойылды. Бұл бағыттағы жұмыс жалғасуда. Шағым түскеннен кейін ақпарат дереу жергілікті экология департаменттеріне, әкімдіктер мен ішкі істер департаменттері қызметтеріне жіберіледі. Мамандар дереу тексеру орнына барып, сол жерде шаралар қолданады. Кінәлілер жазаланады, соның ішінде айыппұлдар да қолданылады», - деп хабарлайды министрліктен.
Естеріңізге сала кетсек, Экология министрлігінің жедел желі телефоны +7 (775) 952-49-00. Бұл нөмірді ватсап арқылы кез-келген қазақстандық өз қаласындағы немесе ауылындағы стихиялық қоқыстар туралы ақпаратты фотосурет пен бейнетүсірілім арқылы растай отырып, қолдана алады.
«Біз барлық тұрғындарды мәселеге бей-жай қарамай, жедел желіге өз аумағындағы стихиялық қоқыс тастау немесе контейнерлердің толып кету фактілері туралы дереу хабарлауды, өздеріңіз оларға ескерту жасап, полицияға хабарласуды сұраймыз. Тек бірлескен жағдайда ғана біз бұл саланы тәртіпке келтіре аламыз», - деді вице-министр Ахметжан Пірімқұлов.
Сонымен қатар, Экология министрлігі осы демалыс күндерінен бастап ұлттық парктерде және демалыс аймақтарында қоғамдық рейд жүргізе бастады. Бұл жергілікті жерлердегі қоршаған ортаны қорғау саласындағы жағдайды бақылауға және жедел шаралар қабылдауға, соның ішінде заңбұзушыларға айыппұл қолдануға мүмкіндік береді. Алайда жағдайды өзгерту үшін жалпы халықтың экологиялық мәдениетін көтеру керек.
858 рет оқылды
