Қоршаған ортаны қорғау күнінің биылғы тақырыбы - «Қайта ойлану. Қайта құру. Қалпына келтіру». ҚР Экология, геология және табиғи ресурстар министрі Мағзұм Мырзағалиев Twitter-дегі парақшасында осылай жазды, деп хабарлайды "Ұлт ақпарат".
«Бүгін, 5 маусым - Дүниежүзілік қоршаған ортаны қорғау күні. Сонымен қатар, Қазақстанның экологтарының кәсіби мерекесі. Бүгінде аса өзекті, күрделі салада еңбек етіп жатқан әріптестерді, ардагерлерді мерекемен құттықтап, істеріне табыс, денсаулық тілеймін», - деп жазды министр.
Оның айтуынша, осы күні экологиялық проблемаларға әлем назарын аудару үшін түрлі шаралар ұйымдастырылады.
«Біз «Бірге - таза Қазақстан» тазалық акциясын дәстүрге айналдырдық.
Қоршаған ортаны қорғау күнінің биылғы тақырыбы - «Қайта ойлану. Қайта құру. Қалпына келтіру». Барша отандастарды «қайта ойланып», табиғат байлықтарын үнемді пайдалануға,жануарлар мен өсімдіктерге жанашырлық танытуға, айналаны таза ұстап, экологиялық өмір салтын ұстануға шақырамын», - деді Мағзұм Мырзағалиев.
Дүниежүзілік қоршаған ортаны қорғау күні БҰҰ Бас Ассамблеясының шешімімен 1972 жылы бекітілген. БҰҰ-ның қоршаған ортаны қорғау жөніндегі бағдарламасын басшылыққа ала отырып өткізіледі.
1115 рет оқылды
