«ҚазМұнайГаз» жанармай құю бекеттерінде бензин 152 теңгеден сатылып жатыр. Алайда мұнда 20 литрден артық бензин берілмейді. Шектеу алдағы бейсенбі күнге дейін болады. Бұл туралы ОКҚ-де өткен брифингте ҚР Энергетика вице-министрі Әсет Мағауов айтты, деп хабарлайды "Ұлт ақпарат" Baq.kz порталына сілтеме жасап.
«Кеше біздің жұмысшылар жанар-жағармай құю станцияларын аралап, бағаға мониторинг жасап шықты. Бағаларға тоқталар болсақ, «ҚазМұнайГаз» АҚ-ның жанармай құю бекеттерінде бензин 152 теңгеге сатылып жатыр. Бірақ «ҚазМұнайГаз» АҚ бензинге лимит қойды. Яғни бензин 20 литрден артық берілмейді. Осы алдағы бейсенбі күнге дейін (12 қазан – автор) жанар-жағармайдың жаңа қоры келуі керек. Содан кейін бензинге деген шектеу алынады. Содан бастап, тұтынушылар қанша алғысы келсе, сонша алатын болады», - деді басшы.
Кейін вице-министр басқа жанар-жағармай құю бекеттерінде бензиннің қанша теңгеге сатылып жатқанын алға тартты.
«Бензин Helios-та -150 теңгеге, Nomad-та – 153 теңгеге, Sinooil-да 152- теңгеге, ГазПромНефть-де – 156 теңгеге сатылуда. Астанада кеше ешқандай кезек болған жоқ. Бензин кезексіз саталып жатыр», - деді Әсет Мағауов.
3838 рет оқылды
