_48_48.jpg)
Фото: dauletten.kz
Астанада шетелдік азамат өзін Ұлттық банк қызметкері ретінде таныстырып, қала тұрғынын 21 миллион теңгесінен айырды. Құқық қорғау органдары күдіктіні “Anti-fraud” жедел алдын алу іс-шарасы барысында ұстады, деп хабарлайды Ult.kz.
Тергеу мәліметінше, алаяқ жәбірленушіге телефон арқылы хабарласып, оның банк шотынан белгісіз тұлғалар ақша шешпек болып жатқанын айтып сендірген. Ол “қауіпсіз шотқа” ақша аударуды ұсынып, бастапқыда 1 миллион теңгені аудартқан.
Кейін іске басқа да алаяқтар қосылып, өздерін құқық қорғау органдарының қызметкерлері ретінде таныстырған. Олар “тергеу жүріп жатыр” деген желеумен жәбірленушіні алдап, оның барлық жинағын тексеру үшін “арнайы курьерге” беруге көндірген.
Нәтижесінде азамат банк шотынан 21 миллион теңгені шешіп алып, қолма-қол ақша түрінде курьерге табыстаған.
Жедел-іздестіру барысында полиция күдіктіні қолға түсірді. Ол қаражатты түрлі шоттарға аударып отырған шетел азаматы екені анықталды.
Қазіргі уақытта күдікті қамауға алынып, іс бойынша тергеу жалғасып жатыр.
Astana қаласында болған бұл оқиға бойынша құқық қорғау органдары азаматтарды банк қызметкерлері атынан жасалатын қоңырауларға сақ болуға шақырды.
47 рет оқылды
