26 шіл, 2022 сағат 14:10

Апта сайын Қазақстанға кемінде 11 мың шетелдік турист келеді - министрлік

Биыл ұлттық парктерге 2 миллионға жуық адам барады деген болжам бар. Бұл туралы Мәдениет және спорт министрлігінің баспасөз қызметі хабарлады.

Ведомство мәліметінше, биыл 550 мың адам Щучинск-Бурабай курорт аймағына барған, бұл өткен жылдың сәйкес кезеңімен салыстырғанда 2 есе көп. Жазғы маусым аясында 240 мыңға жуық адам «Шымбұлаққа» барды, бұл былтырғы жазғы маусымға қарағанда 90 мыңға артық.

2022 жылдың 1 тоқсанының қорытындысы бойынша орналасу нысандарына жайғасқан ішкі туристер саны 21,5% артып, 1,13 млн адамды құрап отыр. Сондай-ақ, орналасу нысандары 26,3 млрд теңге көлемінде қызмет көрсеткен, бұл 2021 жылғы 1 тоқсанмен салыстырғанда 25,7%-ға артық;

Апта сайын Қазақстанға кемінде 11 мың шетелдік турист келеді.

"Дүниежүзілік экономикалық форумның мәліметі бойынша туризмнің жаһандық рейтингінде Қазақстан 2021 жылы өз позициясын жақсартып, 117 елдің арасында 66 - орынды иеленді (2019 жылы-140 елдің ішінде 80-орын). Еліміз «Баға бойынша бәсекеге қабілеттілік» (1-орын), «Туризмнің маусымдылығы» (26-орын), «Табиғи ресурстар» (33-орын), «ЮНЕСКО-ның Дүниежүзілік мәдени мұра объектілерінің саны» (42-орын) көрсеткіштері бойынша жоғары баға алды.

2021 жылы Қазақстанда ішкі туристер саны рекордтық деңгейге жетті: тіркелген адамдар саны шамамен 7 млн" - делінген министрлік хабарламасында.