Әлеуметтік желіде қазақстандық танымал жұлдыздардың қатысуымен өткен тойдың видеосы тарады. Бұл фактіні Алматы қаласының мониторингілік тобы тексеріп жатыр, деп хабарлайды "Ұлт ақпарат".
Видеодан кеш Қазақстанның халық әртісі Нағима Есқалиеваның ұлы әнші Диас Аблаевтың туған күніне орай ұйымдастырылғанын аңғаруға болады. Шараға қатысушылар арасында Әли Оқапов, Индира Еділбаева, Гүлназ Жоланова мен бірнеше Instagram-блогер бар.
Қалалық Санитарлық-эпидемиологиялық бақылау департаментінің мәліметінше, Алматының мониторингілік тобы қазір бұл деректі зерттеп жатыр.
«Тойдың видеосы дәлелді материалды жинау және зерттеу үшін мониторинг тобына жіберілді. Соның негізінде іс-шараны ұйымдастырушы мен жеке тұлғаларға қатысты әкімшілік шаралар қабылданады», - деді Алматы қаласы Санитарлық-эпидемиологиялық бақылау департаментінің орынбасары Сәдуақас Байғабылов.
Оның айтуынша, егер карантин талаптары бұзылғаны анықталса, мекеме иесіне 670 910 теңге (230 АЕК, 1 АЕК - 2917 теңгеге тең), ал жеке тұлғаларға 87 510 теңге (30 АЕК) мөлшерінде айыппұл салынады.
Еске салайық, бұған дейін әнші Қайрат Нұртасқа карантин талабын бұзғаны үшін айыппұл салынған болатын.
1221 рет оқылды
