Дүниежүзілік денсаулық сақтау ұйымы (ДДСҰ) дексаметазонды пайдалануда сақ болуға шақырады. Британдық ғалымдардың пікірінше, дексаметазон Covid-19 вирусымен ауырып жатқан ауыр халдегі науқастардың өмірін құтқарады. ДДСҰ препаратты тек дәрігерлердің бақылауымен ғана қолдану керек екенін атап өтті, деп хабарлайды ҚазАқпарат Би-Би-Сиге сілтеме жасап.
ДДСҰ атап өткендей, дәрі-дәрмек вирустың алдын алатыны немесе аурудың жеңіл түрімен ауыратын науқастарға көмектесуі мүмкін екені туралы мәліметтер жоқ.
Джонс Хопкинс университетінің статистикасы бойынша әлемде Covid-19 жұқтыру жағдайларының саны 8,2 млн адамды құрады. Вирустан 444 мыңға жуық адам көз жұмған.
Ауру жұқтырғандардың басым көпшілігі АҚШ-та. Онда 2,1 миллин адам коронавирус жұқтырған. АҚШ-тың ізінше Латын Америкасы, оның ішінде Бразилия келеді. Ауруды бақылау және алдын алу еуропалық орталықтың мәліметінше, Оңтүстік Африкада расталған жағдайлар саны – 1,6 млн.
Осы тұрғыда Бейжің билігі Covid - 19 екінші толқынының алдын алуға тырысады. Қала іс жүзінде сыртқы әлемнен оқшауланған. Сәрсенбі күні Бейжің әуежайы мыңнан астам рейсті тоқтатты.
Сантьягода карантин күшейтілді
Чили астанасы Сантьягода елдегі ауру жұқтыру саны күрт өскеннен кейін карантин режимі күшейтілді.
Чили - Оңтүстік Америкадағы пандемиядан көп зардап шеккен елдердің бірі. Денсаулық сақтау министрлігінің мәліметі бойынша, елде 220,6 мыңнан астам адамнан Covid-19 ауруы анықталған. 3,3 мыңнан астам адам қайтыс болған.
Швецияда 5000 адам қайтыс болған
Швеция билігі Covid-19 пандемиясынан елде 5000 адам қайтыс болғанын жариялады. Бұл көршілес елдерге қарағанда әлдеқайда көп. Швед билігі пандемияның басталғанда қатаң карантин енгізбеу туралы шешім қабылдаған болатын.
АҚШ-тың үш штатында инфекцияның тәуліктік деңгейі рекордтық көрсеткішке жеткен
Аризона, Флорида және Техас штатының билігі соңғы 24 сағат ішінде коронавирус ауруының рекордтық санын мәлімдеді. АҚШ-тың осы үш штатының әрқайсысында шамамен 2500 жағдай тіркелген.
Флорида губернаторы Рон Де Сантис баспасөз мәслихатында инфекциялар санының көбеюін карантин режимінің әлсіреуімен байланыстырмайтынын айтты.
"Біз жабылмаймыз. Қоғам жұмысын жалғастыруы керек", - деді ол.
АҚШ-тың бас эпидемиологы Энтони Фауки АҚШ әлі де коронавирустық пандемияның алғашқы толқынын бастан өткеріп жатқанын айтты.
Басқа елдердегі жағдай
Германиядағы ет комбинатында коронавирустың өршуіне байланысты 7 мыңға жуық адамды оқшаулау туралы шешім қабылданды. Вирус кәсіпорынның 400-ден астам қызметкерінен анықталды. Гондурас президенті Хуан Орландо Эрнандес Covid-19 жұқтырып, ауруханаға жатқызылды. Оның баспасөз хатшысы президент пневмония екенін хабарлады. Президенттің зайыбынан да коронавирус анықталды, бірақ оның ауруы симптомсыз. Британияда үш ай үзілістен кейін футболдан Премьер-лига ойындары қайта жанданды. Ойындар бос стадиондарда өтеді.
Бразилияда тәулігіне 35 мыңға жуық коронавирус жұқтыру жағдайы тіркеледі. Апта соңына қарай мұнда бір миллион адамнан асады.
Латын Америкасы пандемияның жаһандық орталығына тез айналуда. АҚШ вирус жұқтыру саны бойынша әлемде көш бастап тұр.
675 рет оқылды
