Qazaqstanda respýblikalyq mańyzy bar avtojoldardy jóndeýge bólingen 9,8 mlrd teńgeniń tiimsiz jumsalýyna jol berilmedi, dep habarlaidy ult.kz.
Bas kólik prokýratýrasynyń málimetinshe, kólik prokýrorlary jol jobalaryn tekserý barysynda birqatar qarjylyq jáne tehnikalyq máseleni anyqtaǵan.
Resei shekarasy (Samara baǵyty) – Shymkent avtojolyn ortasha jóndeý jobasynda keibir ýchaskeler Ulǵaisyn – Sekseýil jolyn qaita jańǵyrtý jobasyna da engizilgen. Prokýratýranyń aralasýynan keiin jumys kólemi qaita qaralyp, nátijesinde 7,1 mlrd teńge únemdelgen.
Al Jetibai – Jańaózen – Kendirli – Túrikmenstan shekarasy avtojolyn kúrdeli jóndeý jobasynda birqatar materialdar men jumystardyń quny durys eseptelmegen.
Smeta qaita qaralǵannan keiin jobanyń quny 21,6 mlrd teńgeden 18,9 mlrd teńgege deiin tómendedi. Osylaisha, bul joba boiynsha taǵy 2,7 mlrd teńge únemdelgen.
Jalpy, prokýratýranyń málimetinshe, eki joba boiynsha 9,8 mlrd teńgeniń tiimsiz jumsalýyna jol berilmegen.
Aita keteiik, buǵan deiin Májiliske Úkimet pen Joǵary aýditorlyq palatanyń 2025 jylǵy respýblikalyq biýdjettiń oryndalýy týraly esebi engizilgen. Joǵary aýditorlyq palatanyń tóraǵa orynbasary Daniia Espaeva biýdjette 335 mlrd teńge tapshylyq bar ekenin málimdegen.
