Qazaqstandyqtarǵa jyl basynan beri múgedektik jáne asyraýshysynan aiyrylý jaǵdaiy boiynsha járdemaqy túrinde 260 mlrd teńgeden astam qarajat tólendi, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Vedomstvonyń málimetinshe, 2021 jylǵy qańtar-tamyz ailary aralyǵynda respýblikalyq biýdjetten múgedektigi boiynsha memlekettik áleýmettik járdemaqy tóleýge 206,6 mlrd teńge, asyraýshysynan aiyrylý jaǵdaiyna bailanysty memlekettik áleýmettik járdemaqy tóleýge 54,3 mlrd teńge baǵyttalǵan.
2021 jyldyń tamyz aiynda respýblikalyq biýdjetten múgedektigi boiynsha memlekettik áleýmettik járdemaqy tóleýge 26,1 mlrd teńge, asyraýshysynan aiyrylý jaǵdaiy boiynsha memlekettik áleýmettik járdemaqy tóleýge 6,5 mlrd teńge jumsaldy.
1 qyrkúiektegi jaǵdai boiynsha múgedektigi boiynsha memlekettik áleýmettik járdemaqy alýshy - 528,6 myń adam, asyraýshysynan aiyrylǵandar - 160 myń.
«Múgedektik jáne asyraýshysynan aiyrylý jaǵdaiy boiynsha memlekettik áleýmettik járdemaqy mólsheri múgedektik tobyna jáne sebebine, qaitys bolǵan (qaza tapqan) asyraýshynyń asyraýyndaǵy adamdar sanyna, sondai-aq tiisti qarjy jylyna arnalǵan «Respýblikalyq biýdjet týraly» zańynda belgilenetin eń tómen kúnkóris deńgeiiniń shamasyna bailanysty bolady», delingen habarlamada.
Ministrliktiń málimetinshe, 1 qyrkúiektegi málimetke sáikes múgedektigi boiynsha memlekettik áleýmettik járdemaqynyń ortasha mólsheri - 49 375 teńge, asyraýshydan aiyrylý jaǵdaiy boiynsha memlekettik áleýmettik járdemaqynyń ortasha mólsheri - 40 543 teńge.
