«Jýsan» operatsiiasynyń nátijesinde qazaqstandyq 77 áiel radikaldy ideologiiadan óz erkimen bas tartty. Bul týraly QR Terrorizmge qarsy ortalyq shtabynyń bólim basshysy Janarbek Jańabaev málim etti, dep habarlaidy QazAqparat.
«Siriiada terroristik uiymdardyń qurbany bolyp, «Jýsan» operatsiiasynyń arqasynda qurqarylǵan birqatar otandastarymyz týraly bilesizder. Atalǵan operatsiia aldynda daiyndyq jumystary júrgizildi. Arnaiy top Siriiaǵa baryp jaǵdaidy baqylaýdy, onyń jospary ázirlendi. «Jýsan» operatsiiasy arqyly arqyly barlyǵy 607 qazaqstandyq elge oraldy. Onyń ishinde 37 erkek, 157 áiel jáne 413 bala (sonyń ishinde 34 jetim bala) elge aman-saý jetkizildi. Sonymen qatar 59 adam qylmystyq jaýapqa tartyldy. Qazaqstanǵa kelgen soń otandastarymyzdy beibit ómirge beiimdeý sharasy ótkizildi. Nátijesinde 88 áiel islamdy qaita qabyldap, 77 áiel radikaldy ideologiiadan bas tartty», - dedi Janarbek Jańabaev «Kazakhstan Security Systems -2021» atty respýblikalyq konferentsiia barysynda.
Onyń aitýynsha, «Jýsan» operatsiiasyna kóptegen elder qyzyǵýshylyq tanytyp jatyr.
«Bizdiń tájiribemizge qyzyǵýshylyq tanytyp jatqan biraz elder bar. Qazaqstanda terrorizmge qarsy jáne aldyn alýǵa qatysty sharalar memlekettik deńgeide 2000 jyldary qolǵa alyndy. Sodan beri 20 jyldan astam ýaqyttyń ishinde memlekettik deńgeidegi sheshimder óz nátijesin berip otyr. Terrorizmmen kúreste barlyq memlekettik jáne quzyrly organdar ózara tyǵyz bailanysta jumys istep keledi», - deidi ol.
Aita keteiik, búgin elordada terroristik qaýip-qaterge qarsy kúres taqyrybyna arnalǵan 8-shi respýblikalyq konferentsiia ótip jatyr.
Atalǵan sharada qaýipsizdikti nyǵaitý salasyndaǵy búgingi ahýal men tendentsiialar ortaǵa salynyp jatyr. Jáne konferentsiia QR Ulttyq qaýipsizdik komitetiniń Terrorizmge qarsy ortalyǵynyń uiytqy bolýymen ótýde.
