«Jýsan» operatsiiasy aiasynda terroristik belsendilik aimaǵynan qaityp kelgen 144 áiel radikaldy kózqarasynan bas tartty. Operatsiianyń nátijesi jaily halyqqa esep berý kezdesýinde Aqparat jáne qoǵamdyq damý ministri Aida Balaeva málim etti, dep habarlaidy QazAqparat.
«Ministrliktiń endigi úlken jaýapty salasy – din salasy. Bul baǵytta bizdiń aldymyzda 3 ózara bailanysty mindet tur. Birinshisi – halyq arasyna zaiyrly memleket qundylyqtaryn nasihattaý, ekinshisi – dinaralyq kelisimdi saqtaý, úshinshisi – dini ekstremizmdi boldyrmaý», - dedi Aida Balaeva OKQ alańy arqyly halyqqa esep berý kezdesýinde.
Ministrdiń aitýynsha osy mindetterdi iske asyrý úshin birneshe baǵytta jumys júrgizilip jatyr.
«Bul – aqparattyq-túsindirý jumystary, destrýktivti dini kózqarastaǵy azamattardy raiynan qaitarý jáne internet arqyly dini ekstremizm ideologiiasyna qarsy jumystar. Ótken 2019 jyly aqparattyq-túsindirý toptarynyń kúshimen 3 miliondai adamdy qamtyǵan 50 myńnan astam is-shara ótti. Din salasyndaǵy problemalyq suraqtarǵa jedel jaýap berý úshin 300 adamnan turatyn bilikti lektorlar pýly quryldy. Kórip otyrǵandaryńyzdai, jumys óte tiimdi. Sondyqtan osy jyly biz bul toptardaǵy mamandardyń sanyn 500-ge deiin arttyryp, 1200 lektordy qaita daiarlyqtan ótkizýdi josparlap otyrmyz», - dedi ol.
Aida Balaeva sonymen birge «Jýsan» operatsiiasynyń nátijesinde elge oralǵan 163 áielmen maqsatty túrde jumys júrgizilgenin, sonyń arqasynda olardyń 144-i radikaldy oilarynan qaityp, birazy zaiyrly ómir saltyna ótkenin jetkizdi.
«Árine, máseleniń saldarymen emes sebebimen kúresý kerek. Sondyqtan 2019 jyly 5300-den asa internet-resýrs saraptalyp, onyń 3200-nen zańǵa qaishy materialdar anyqtaldy. Olardyń barlyǵy der kezinde buǵattaldy. Túptep kelgende bul saladaǵy biz úshin eń mańyzdysy – halyqtyń radikaldy aǵymdarǵa qarsy immýnitetin qalyptastyryp, eldegi dinaralyq qaqtyǵystardyń aldyn alý», - dedi ol.
