Tarazda Táýelsizdiktiń 30 jyldyǵyna jáne eki márte Sotsialistik Eńbek Eri Jazylbek Qýanyshbaevtyń 125 jyldyǵyna arnalǵan birinshi respýblikalyq ǵylymi-tájiribielik konferentsiia ótti, dep habarlaidy QazAqparat.
«Rýhani jańǵyrý» baǵdarlamasy sheńberinde «Respýblikalyq mal ósirýshiler sleti-2021» sharasy aiasynda ótken konferentsiiaǵa oblys ákimi Berdibek Saparbaev, aýyl sharýashylyǵy ministri Erbol Qarashókeev jáne Premer-Ministr keńsesi, Shymkent qalasynyń, Almaty, Qyzylorda, Túrkistan oblysy ákiminiń orynbasarlary, qoǵamdyq birlestikterdiń ókilderi men Taraz óńirlik ýniversitetiniń professor - oqytýshy quramy qatysty.
Sharanyń ashylýynda oblys ákimi QR Prezidenti Qasym-Jomart Toqaevtyń arnaiy joldaǵan hatyn qatysýshylarǵa tanystyrdy.
Memleket basshysynyń hatynda Jazylbek Qýanyshbaev – elimizdiń mal sharýashylyǵyn damytýǵa ólsheýsiz úles qosqan dańqty shopan ekendigi, kóp jylǵy eren eńbeginiń arqasynda asa tanymal tulǵaǵa ainalǵany aitylǵan.
Sonymen qatar, Tarazda tulǵaǵa laiyqty qurmet kórsetilip, barynsha dáriptelip jatqanyn quptarlyq qadam dep baǵalap, mundai sharalar ásirese, jas býyndy atakásipke adal bolýǵa úndep, ónimdi eńbek etýge jigerlendiretinin atap ótken Memleket basshysy konferentsiia jumysyna sáttilik tilegen.
Berdibek Saparbaev jiynnyń mańyzyna toqtalyp, Elbasy men Memleket basshysynyń qoldaýynyń arqasynda aýyl sharýashylyǵyn damytýǵa baǵyttalǵan birqatar iri maqsatty baǵdarlamalar júzege asyrylyp, oń nátije berip jatqanyn aitty.
«Eńbek – er atandyrady» degen naqyl sóz dál «Dala akademigi», «Malshylardyń marshaly» atianǵan, búkil ǵumyryn aqtyly qoi ósirýge arnaǵan, óńirdiń gúldenip, kórkeiýine úlken úles qosqan Jazylbek Qýanyshbaevqa arnap aitylǵandai. Ol jarty ǵasyrdai adal eńbegimen shalǵaida jatqan aýdannyń atyn aspandatyp, mereiin kóterdi. Qyrqynshy jyldardyń basynda qarakól qoiyn ósirý qolǵa alynǵanda, Jazylbek Qýanyshbaev onymen alǵash ainalysqandardyń biri edi. Aǵa shopannyń, ásirese, soǵys kezindegi eńbegi elge erekshe úlgi boldy», - degen aimaq basshysy danqty shopannyń igi isin búgingi jerlesteri de jalǵastyryp jatqanyn jetkizdi.
Qazirgi tańda oblysta qarakól qoi sharýashylyǵyn damytý maqsatynda 3 qarakól qoi sharýashylyǵyna beiimdelgen qojalyq uiymdastyryldy.
Osy saladaǵy jetekshi ǵalymdarmen birge qoidy qoldan uryqtandyrý tehnologiiasy paidalanylýda.
Aýyl sharýashylyǵy ministri Erbol Qarashókeev elimizdiń agroónerkásiptik kesheninde qalanǵan jaqsy negiz jáne kópjyldyq tájiribeniń arqasynda koronovirýs pandemiiasyna bailanysty daǵdarysqa qaramastan salada turaqty jaǵdai saqtalyp otyrǵandyǵyn tilge tiek etti.
«Qazaqstan fermerler odaǵy» qaýymdastyǵynyń prezidenti Jigýli Dairabaev, QR Ulttyq Ǵylym akademiiasynyń korrespondent-múshesi Ábdirahman Ombaev, Atyraý oblysynyń kásipkeri Nazerke Kýsesova da sóz alyp, oramdy oilaryn ortaǵa salyp, usynys-pikirlerin bildirdi.
«Qazirgi zamanda kópshilik qoi baǵýdyń qiyndaǵanyn, tipti, tiimsiz bolyp qalǵanyn alǵa tartady. Jún de, teri de suraýsyz qalǵan soń, babalarymyz aitqandai, qoi baǵýdyń paidasy «kól-kósir» bolmai jatyr. Biraq, Qazaqstannyń jeri keń baitaq. Ónimniń ózindik quny tómen bolýy úshin jaiylym jerlerdi barynsha tiimdi paidalanýymyz qajet. Zaman ózgergenimen, qoidyń fizalogiiasy sol qalpynda qaldy», - degen Jigýli Dairabaev bul salada jańa tehnologiialardy igerip, burynǵy qoi baǵý dástúrlerimizben úilestirip, áleýetti barynsha arttyrý kerektigin aitty.
«Jazylbek Qýanyshbaev Qazaqstandaǵy qoi sharýashylyǵyn damytýda kóp eńbek sińirgen tulǵa. Ol elimizde alǵash ret óziniń sharýashylyǵynda qoldan uryqtandyrý ádisin engizgen. Ata kásipti damytýǵa airyqsha úles qosqan abyz aqsaqal bul iske jastardy baýlý, tárbieleý jolynda kóp eńbek ete bildi. Bul konferentsiia Jaz-atanyń tájiribesin nasihattap, taratýda, sol arqyly qoi sharýashylyǵyn damytýǵa yqpal etýde mańyzy zor bolady dep oilaimyn»,-dep atap ótti QR Ulttyq Ǵylym akademiiasynyń korrespondent-múshesi Ábdirahman Ombaev.
Qonaqtar óńirdegi oń ózgeristerdi, sharanyń uiymdastyrylýyn joǵary baǵalap, oblys basshylyǵyna alǵys bildirdi.
Konferentsiia barysynda «Jalpaq jurttyń Jaz atasy» kitabynyń tusaýy kesildi.
