Elorda ákimi Altai Kólginov Imanov-Brýsilovskii kósheleriniń qiylysynda salynyp jatqan mektepti 1 qyrkúiekke deiin aiaqtaýdy tapsyrdy, dep habarlaidy "Ult aqparat".
Ákimdik aqparatyna sáikes, qazir oqý ornynda ishki árleý, batareia ornatý jáne aýmaqty abattandyrý jumystary júrgizilýde. Kabinetter men ashanalarǵa arnalǵan jihaz, sport jabdyqtary satyp alynǵan. Sýmen jabdyqtaýǵa jáne elektr energiiasyna qosylýǵa ruqsat bar. Tek jumys qarqyny baiaý júrip jatyr. Altai Kólginov oqý jylynyń basynda mektep ashylýǵa daiyn bolýy kerektigin tapsyrdy.
«Oqý jylynyń bastalýyna toǵyz kún qaldy. Sizdiń jumysyńyz áli de oryndalmaǵan. Mektep aýlasy abattandyrylmaǵan, sý men jaryq ótkizilmegen. Jańa mektepterdi bir jyldan keiin kúrdeli jóndeý júrgizýge týra kelmeitindei etip salý kerek. Qazirgi tańda eski mektepter jańalary siiaqty jóndeýdi qajet etpeidi. Shatyrǵa erekshe kóńil bólińiz. Jańbyr maýsymy bastalady. Oqý ornynda balalar ózderin qaýipsiz jáne jaily sezinýi tiis», - dedi ol.
Bilim mekemesi 900 orynǵa eseptelgen.
Elordada biylǵy oqý jylynda 3 jańa mektep pen 5 qosalqy qurylys ashylady.
A.Kólginov ótken aptada «Michýrin» turǵyn alabynda ornalasqan mektepke barǵan bolatyn. Onyń ashylýy ekinshi toqsanǵa josparlanyp otyr.
Jalpy bes jyldyń ishinde 37 jańa mektep salý josparlanǵan. Sondai-aq, investorlar elordada 11 jekemenshik mektep salýǵa múddeli. Investitsiia somasy 27,6 mlrd teńgeni quraidy.
