«Eńbek resýrstaryn damytý ortalyǵy» AQ prezidenti Dáýlet Arǵyndyqov eldegi resmi jumyssyzdar men tirkelgen jumyssyzdar sanynyń arasyndaǵy aiyrmashylyqtyń sebebin túsindirdi, dep habarlaidy QazAqparat.
«Ekinshi toqsannyń statistikasy boiynsha eldegi jumyssyzdyq kólemi 4,9 paiyzdai boldy. Iaǵni, shamamen 450 myń adam jumyssyz degen sóz. Bul san halyqaralyq metodika boiynsha júrgizilgen zertteý qorytyndysynan alyndy. Iaǵni, 21 myń úi sharýashylyǵynda saýal júrgizgen.
Jumysyzdardyń bári jumyspen qamtý ortalyqtaryna bara bermeitinin bárimiz bilemiz. Onyń obektivti sebepteri kóp», - dedi ol «Qazaqstannyń eńbek naryǵy: jańa jaǵdaidaǵy damý» atty tuńǵysh ulttyq baiandamanyń tanystyrylymynda.
Onyń aitýynsha, eldegi tirkelgen jumyssyzdardyń sany resmi statistikadaǵy sannan áldeqaida az. Al bul halyqtyń jumyspen qamtý ortalyqtaryna degen senimi kórsetetin mayzdy faktor kórinedi.
«Jumyssyz retinde arnaiy tirkelgenderdiń sany apta basynda 223 myń boldy. Ony jalpy eńbekke jaramdy adam sanyna bólsek, 2 paiyzdai ǵana bolady. Bizdiń jumyssyzdardyń resmi statistikasy men tirkelgen jumyssyzdar statistikasynyń arasynda 50 paiyz aiyrmashalyq bar dep otyrǵanymyz - osy. Bul, túptep kelgende, halyqtyń jumyspen qamtý ortalyqtaryna degen senimin kórsetedi. Resmi jumyssyzdar stastistikasy men tirkelgen jumyssyzdar sany bir-birine jaqyndaǵan saiyn memlekettiń eńbekpen qamtý sharalaryna eldiń senimi arta túsedi degen sóz. Qazir bul senim birtindep bolsa da, ósip keledi», - dedi Dáýlet Arǵyndyqov.
