QR Premer-Ministri Asqar Mamin jumys saparymen Qazaqstannyń jetekshi ónerkásiptik óńirleriniń biri Aqtóbe oblysynda bolyp qaitty, dep habarlaidy "Ult aqparat".
Jumys sapary aiasynda Úkimet basshysy QR Tuńǵysh Prezidenti N. Á. Nazarbaev bastamashy bolǵan indýstriialyq-innovatsiialyq damý memlekettik baǵdarlamasynyń iske asyrylýyn, Memleket basshysy Q. K. Toqaevtyń el óńirleriniń ekonomikasyn damytý jónindegi tapsyrmalarynyń oryndalý barysyn qarady.
Oblys ortalyǵynda Premer-Ministr Aqtóbe ferroqorytpalar zaýytyna, hrom kenderiniń sapasy jóninen álemdegi eń iri jáne qorytpalardy óndirý jáne jetkizý boiynsha ekinshi oryndaǵy «Qazhrom» TUK» AQ bólimshesine bardy. Aqtóbe qalasyndaǵy zaýyt jyl saiyn 440 myńǵa jýyq tonna ónim shyǵarady. Asqar Mamin tsehtyń metaldardy baiytý jáne óndirý jumystarymen tanysty. Sonymen qatar, Hromtaý qalasyndaǵy «Voshod» ken ornyndaǵy jylyna 1 mln tonna ken óndiretin taý-ken baiytý keshenine bardy.
QR Premer-Ministrine 2019 jyldyń basynan beri Aqtóbe oblysyndaǵy ónerkásip ónimi óndirisiniń kólemi 1 trln teńgeden asyp, 4,9%-ǵa artqany týraly baiandaldy, sonyń ishinde hrom kenin óndirý 5,7%-ǵa ulǵaidy.
Úkimet basshysy Baiǵanin jáne Muǵaljar aýdandarynda gaz óńdeý kásiporyndarynyń jumysymen tanysty, atap aitqanda, «Gaz protsessing kompani» JShS, «SNPS-Aqtóbemunaigaz» AQ Jańajol gaz óńdeý zaýytyna bardy. Zaýyttardy tehnologiialyq jańǵyrtý barysyna jáne zamanaýi tsifrlyq jobalardy engizýge kóńil bólindi.
Jańajol GÓZ aýmaǵynda Asqar Mamin memlekettik organdardyń, munai-gaz sektoryndaǵy kásiporyndardyń jáne kásipodaqtardyń basshylarynyń qatysýymen munai-gaz salasyn damytý máseleleri jóninde jumystyq keńes ótkizdi. Talqylaý barysynda salany damytýdyń ózekti máseleleri, eńbek qatynastaryn retteý, tabys deńgeiin arttyrý boiynsha bastamalardy iske asyrý, mamandardy daiarlaýda jańa tásilderdi engizý arqyly kadrlarda qazaqstandyq qamtý úlesin arttyrý máseleleri qaraldy.
Úkimet basshysy qazirgi zamanǵy jaǵdailardy eskere otyryp, eńbek qatynastaryn retteýdiń qoldanystaǵy júiesin túzetýdi tapsyrdy. Asqar Mamin zańnamalyq ózgeristerdi ázirleý jáne engizý qajettiligin aitty. Atap aitqanda, jumysshylardyń jalaqy boiynsha quqyqtarynyń kemsitilýine jol bermeý, qaýipsiz eńbek jaǵdailaryn qamtamasyz etý qajet.
Ken oryndaryndaǵy ekologiialyq qaýipsizdikti qamtamasyz etýge, tabiǵi resýrstardy qorǵaýǵa erekshe kóńil bólý tapsyryldy.
Jumys sapary aiasynda Asqar Mamin sonymen qatar uzyndyǵy 319 shaqyrym bolatyn «Aqtóbe – Atyraý – RF shekarasy (Astrahan)» respýblikalyq avtomobil jolynyń salyný barysymen, «Aqtóbe q. ońtústik ainalma joly» jergilikti mańyzy bar avtojolynyń rekonstrýktsiiasymen tanysty, sondai-aq «IBG Catering» JShS jol boiy servisiniń kópfýnktsionaldy keshenin aralady.
QR Úkimetiniń basshysy óńirdegi turǵyn úi máseleleriniń sheshilýine airyqsha nazar aýdardy. Asqar Mamin salynyp jatqan «Nur Aqtóbe» yqsham aýdanyn aralap kórdi, onda biyl jyl sońyna deiin 2 myńnan astam páter paidalanýǵa beriledi. Sonymen qatar, «Kóktas-Aqtóbe» qurylysy materialdary zaýytyna, sondai-aq «qarapaiym zattar ekonomikasy» baǵdarlamasynyń jobasy – «Global Spetsodejda» tigin fabrikasyna bardy.
Jumys saparynyń sońynda QR Premer-Ministri óńirde aýyl sharýashylyǵy salasyndaǵy investitsiialyq jobalardyń iske asyrylýy boiynsha «Aqtóbe et klasteri» JShS et óńdeý kombinaty men «Ais» JShS sút-taýarlyq fermasyna bardy.
