Jumyspen qamtýdyń jol kartasy aiasynda qazirdiń ózinde 130 myńnan astam jumys orny quryldy, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
Jumyspen qamtýdyń 2020-2021 jyldarǵa arnalǵan jol kartasy aiasynda 6 107 jobany iske asyrý bastalyp, olar boiynsha 130,6 myń jumys orny quryldy.
JQJK aiasynda jergilikti atqarýshy oryndar iske asyrý úshin 6 506 jobany iriktep aldy.
JQJK infraqurylymdyq jobalaryn iske asyrý 4 negizgi baǵyt boiynsha ótedi:
– áleýmettik-mádeni nysandardy kúrdeli jáne aǵymdaǵy jóndeý, rekonstrýktsiialaý jáne salý (2 703 joba);
– turǵyn úi-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýktsiialaý (1 039 joba);
– injenerlik-kólik infraqurylymyn kúrdeli, ortasha jáne aǵymdaǵy jóndeý, rekonstrýktsiialaý jáne salý (1 799 joba);
– eldi mekenderdi abattandyrý (965 joba).
JQJK infraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin qoldanýdy qamtamasyz etý erekshe shart bolyp tabylady. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriletin bolady. Merdigerler sanitarlyq-epidemiologiialyq sharalardy qoldana otyryp, qaýipsiz eńbek jaǵdaiyn qamtamasyz etýge tiis.
Óńirlerde 6 107 joba boiynsha jumys bastaldy, 130,6 myń jumys orny quryldy, onyń ishinde halyqty jumyspen qamtý ortalyqtary arqyly 71,3 myń adam jumysqa ornalasty.
JQJK aiasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.
Budan buryn habarlaǵandai, JQJK iske asyrýdyń aitarlyqtai oń áseri sezilmek.
Mysaly, 80 jańa bilim obektisiniń qurylysy apatty jáne úsh aýysymdy mektepterdiń máselelerin sheshýge, aýyldyq jerlerde bilim berý oryndaryna qoljetimdilikti arttyrýǵa, sondai-aq 7 myńǵa jýyq muǵalimdi turaqty jumysqa ornalastyrýǵa múmkindik beredi.
24 densaýlyq saqtaý obektisiniń qurylysy alǵashqy meditsinalyq-sanitariialyq kómekke qoljetimdilikti arttyrady, sondai-aq shamamen 1 myń meditsina qyzmetkerin jumysqa ornalastyrýǵa múmkindik beredi.
36 mádeniet jáne sport nysanynyń qurylysy buqaralyq sportty damytýǵa oń áser etip, jastar úshin bos ýaqyt máselesin sheshýge jáne 1,6 myń adamdy turaqty jumyspen qamtamasyz etýge múmkindik beredi.
Óz kezeginde, sý sharýashylyǵynyń 12 jańa obektisin salý jáne qoldanystaǵylaryn jańǵyrtý halyq úshin aýyz sýdyń qoljetimdiligin arttyrady, sýarmaly jerlerdiń kólemin keńeitýge, paidalanylmaityn jerlerdi ainalymǵa tartýǵa, aralas salalarda 77 myń adamdy jumyspen qamtamasyz etýge múmkindik beredi.
Turǵyn úi-kommýnaldyq sharýashylyqtyń 247 jańa obektisin salý jáne qoldanystaǵylaryn jańǵyrtý turǵyn úi qurylysy úshin jaǵdai jasaidy, aýyl turǵyndary úshin kommýnaldyq qyzmetterdiń qoljetimdiligin qamtamasyz etedi, kommýnaldyq jeliniń tozýyn tómendetedi.
Eldimekenderdi abattandyrý olardyń syrtqy kelbetin jaqsartyp qana qoimai, azamattardyń qaýipsiz jáne jaily demalysy úshin jaǵdai jasaidy.
