Premer-ministr orynbasary Eraly Toǵjanov «Áleýmettik jelide Mańǵystaý óńirinde jumys máselesi kúrdeli, kúnde aiqai tolastar emes. Jumysyzdar sany kóp. Mańǵystaýda 5 myń jumys kózi ashylady dep aitylǵanyna qaramastan birde bir jumys orny ashylǵan joq dep jazylýda. Osy týraly ne aitasyz» degen jýrnalistiń saýalyna Úkimet kýlýarynda jaýap berdi, dep habarlaidy Baq.kz agenttigi.
"Birinshiden, Mańǵystaý oblysyn áleýmettik-ekonomikalyq damytý jónindegi 2021-2025 jyldarǵa arnalǵan keshendi jospar ázirlenip, iske asyrylýda. Keshendi josparǵa sáikes óńirde Jalpy 55 myń jumys oryndaryn ashý kózdelgen, onyń ishinde biyldyń ózinde 15 myńǵa jýyq jumys oryndaryn ashý josparlanǵan", - dedi Eraly Toǵjanov.
Bul jospardyń árbir tarmaǵyn iske asyrý boiynsha jaýapty naqty memlekettik organdar anyqtalǵan. Keshendi jospardyń oryndalýy Úkimettiń baqylaýynda.
"Statistikalyq derekterge sáikes 2022 jyldyń 1-shi toqsanynda Mańǵystaý oblysynda 17,3 myń jumyssyz adam tirkelgen. (jumyssyzdyq deńgeii – 4,9%). Ekinshiden, jalpy jyl basynan beri Mańǵystaý oblysynda 11,5 myńnan asa jumysqa ornalastyryldy (onyń 6,7 myńy turaqty jumystar). Onyń ishinde 4,3 myń jumys orny Jańaózen qalasynda (onyń 2,7 myńy turaqty jumys oryndary). Iaǵni jospar oryndalýda. Bul júrgizip jatqan jumystardyń naqty nátijesi", - dedi ol.
Jumyspen qamtý ortalyqtary arqyly – 9,7 myń jumys orny. Qazmunaigaz AQ qurylymdarynda – 561 jumys orny. Servistik kompaniialarda – 321 jumys orny. Basqa da jumys kózderinde – 646 jumys orny.
"Úshinshiden, Mańǵystaý oblysyndaǵy áleýmettik-eńbek ahýaly Úkimettiń kúndelikti, turaqty baqylaýynda. Oblysta óńir basshysynyń jetekshiligimen arnaiy shtab turaqty túrde jumys istep jatyr. Tórtinshiden, tek munai salasynda ǵana jumys isteýim qajet degen talap qoiý orynsyz. Jumyssyz turǵyndardyń barlyǵyn munai salasyna ornalastyrý múmkin emes. Jalpy «jumys joq» dep, qol qýsyryp, qarap otyrýǵa bolmaidy. Áreket jasaǵan adamdarǵa jumys árqashan tabylady", - dedi Toǵjanov.
Qaryndasymyz Dinara Naýmova múmkindigi shekteýli bolýyna qaramastan óz isin ashyp, ózin jumyspen qamtyp qana qoimai, 70-ten asa adamǵa jumys berip otyr.
"Halqymyzda «Áreket túbi bereket» degen naqyl sóz bar. Týmysynan eki qoly joq Anar Beksultanovanyń erik-jigeri jastarymyzǵa úlgi bolýy tiis. Ol aiaǵymen is tigýdi úirenip, óz kásibin ashqan. Saryaǵashtyq taksist, taǵdyrdyń jazmyshymen eki aiaǵynan airylǵan Nurjan baýyrymyzdyń áleýmettik jelilerde taraǵan videosyn bárińiz kórdińizder. Ol «jumys joq degenge senbeimin» deidi. Sondyqtan jumys izdegen adam naryqtyń suranysyna sáikes biliktiligin kóterip, kásipkerlikti qoldaý baǵdarlamalarynyń múmkindigin paidalanyp, eńbek etý qajet dep oilaimyn. Besinshiden, jumys oryndary týraly máseleni kótergende tek Mańǵystaý oblysyn ǵana aitýǵa bolmaidy. Budan da kúrdeli máseleler basqa óńirlerde de bar. Atyraý oblysynda TShO kompaniiasynyń «Bolashaq keńeitý» jobasynyń aiaqtalýyna bailanysty jyl sońyna deiin 37 myń qazaqstandyq bosatylady dep kútilýde (2 myń sheteldik). Qazirdiń ózinde 6 myńnan asa adam bosatyldy. Onyń 1,5 myńy jumysqa ornalastyryldy. Bosaǵan qyzmetkerlerdi basqa jobalarǵa tartý, qaita daiarlaý boiynsha naqty jumystar júrgizilýde", - dedi ol.
