QR bas sanitar dárigeriniń 14 shildedegi qaýlysynda kórsetilgen sanatqa jatatyn jumys berýshiler vaktsina almaǵan nemese 7 kún saiyn PTR-testileý arqyly saýlyǵyn dáleldemegen qyzmetkerlerdi shtattyq rejimde jumysqa jiberse, aiyppul arqalaýy múmkin, dep habarlaidy "Ult aqparat".
Ákimshilik quqyq buzý týraly kodekstiń 462-babynyń 3-bóligi men 425-babynda osyndai normalar qarastyrylǵan.
Bas sanitar dárigerdiń 14 shildedegi qaýlysy boiynsha jumysy halyqtyń shoǵyrlanýymen bailanysty qyzmet kórsetý nysandaryna qyzmetkerlerin 10 tamyzǵa deiin COVID-19-ǵa qarsy vaktsinanyń birinshi komponentimen, 1 qyrkúiekke deiin vaktsinanyń ekinshi komponentimen qamtamasyz etý júktelgen bolatyn.
Osy talapty oryndamaǵan jumys berýshiler Ákimshilik quqyq buzý týraly kodekstiń 362-babynyń 3-bóligi jáne 425-baby boiynsha jaýapqa tartylýy múmkin.
Iaǵni meditsinalyq qarsy kórsetilimi bolmasa da vaktsina almaǵan nemese 7 kún saiyn PTR-testileý arqyly óziniń virýstan aman ekenin dáleldep otyrmaǵan adamdardy shtattyq rejimde jumysqa jiberse, 14 585 – 1 458 500 teńge aralyǵynda (5-ten 500 AEK-ke deiin) aiyppul arqalaidy.
Aiyppuldyń mólsheri jumys berýshiniń mártebesine bailanysty ulǵaiyp otyrady. Bul atalǵan kodekstiń 462-babynyń 3-bóliginde kórsetilgen.
Atalǵan normada memlekettik baqylaý jáne qadaǵalaý organdarynyń, laýazymdy tulǵanyń óz quzyreti sheginde qoiǵan zańdy talaptaryn saqtamaǵan jumys berýshiniń, kásiporynnyń tutas nemese jeke qyzmetine berilgen ruqsattyń kúshi ýaqytsha toqtalýy múmkin ekeni aitylǵan.
Al aiyppul kólemi kelesidei:
- jeke tulǵalarǵa – 5 AEK;
- laýazymdy adamdarǵa – 15 AEK;
- shaǵyn kásipkerlik sýbektilerine nemese kommertsiialyq emes uiymdarǵa – 100 AEK;
- orta kásipkerlik sýbektilerine – 200 AEK;
- iri kásipkerlik sýbektilerine – 500 AEK.
