Jumys berýshiler vaktsina almaǵandardy jumystan ótemaqysyz shettete alady. Ortalyq kommýnikatsiialar qyzmetinde ótken brifingide QR Bas memlekettik eńbek inspektory Tólegen Ospanqulov osyndai málimet aitty, dep habarlaidy QazAqparat.
«Vaktsinatsiia - qazirgi tańda óte ózekti másele bolyp otyr. Bizge óte kóp saýaldar kelip túsedi. Búgingi tańda Densaýlyq saqtaý ministrligi sanitarlyq norma jariialady. Dúisenbiden beri ol norma kúshine engen bolatyn. Sol normada jumys berýshi mindetti vaktsinatsiiadan ótpegen adamdy jumysqa jibermeýi kerek ekeni jazylǵan. Mindetti vaktsina almaǵan adamdar PTR testiden ótýi kerek», - dep túsindirdi eńbek inspektory.
Mamannyń aitýynsha, bul – respýblikalyq problema.
«Eńbek kodeksiniń talaptary boiynsha búgingi tańda jumys berýshiler respýblikanyń nemese óńirdiń bas sanitar dárigeriniń qaýlysy negizge ala otyryp, vaktsina almaǵan jáne PTR testiden ótpegen jumysshylardy eńbekke aralastyrmaý kerek. COVID-19-ben aýyrǵan adamdy jumysqa jibermeý kerektigi týraly tikelei norma bolmaǵanymen, Eńbek kodeksiniń 48-babynyń 1-bóliginde zańnamalyq jáne memlekettik organdar shyǵarǵan aktiler negizinde eńbekten shekteýge jol beriletini aitylǵan. Iaǵni, Densaýlyq týraly kodeks boiynsha Bas sanitar dárigerdiń qaýlysyn oryndaý mindetti. Sondyqtan qazirgi tańda jumys berýshiler vaktsina almaǵan jumysshylardy eńbekten shekteýge quqyly. Tipti jumystan shettetilgen ýaqytta ailyq tólemei de shektei alady. Biraq ekijaqty kelisim bolsa, ailyqtyń 50 paiyzyn nemese eń tómengi ebekaqy mólsherin tólei alady. Biraq eki jaqtyń da kelisimi bolǵanda ǵana osylai bolýy múmkin», - dedi Tólegen Ospanqulov.
