Qazaqstandyq sportshy Jalǵas Jumaǵulov Instagram paraqshasynda UFC promoýshenindegi ekinshi jekpe-jegi týraly pikir bildirdi. Ol qoldaýshylar men jankúierlerine alǵys bildirip, ózin synaǵandarǵa da jaýap berdi, dep habarlaidy Sputnik Qazaqstan.
"Jankúierlerdiń úmitin aqtai almaǵanyma qaramastan, maǵan qoldaý bildirip jazatyndar óte kóp. Sol úshin zor alǵys. Sondai-aq, óz oi-pikirin bildirip, meni synaǵandarǵa da rahmet aitamyn", – dep jazdy sportshy.
Ol mundai uiymda respýblika atynan áreket etý úlken jaýapkershilik ekenin aita kele, ózine tym kóp júkteme alǵanyn atap ótti.
"Men óz elimniń týyn biikke kótere almaǵanyma ókinemin. Men qolymnan kelgenniń bárin jasaýǵa tyrystym. Bar kúshimdi saldym, halqymnyń aldynda shyn nietimmen áreket ettim, biraq bári men qalaǵandai bolmady", – dedi Jumaǵulov.
Endigi jerde Jumaǵulov demalyp, qaita kúsh jinaýdy josparlap otyr jáne ol jeńildim dep bárinen baz keshpeitinin basa aitty.
Aita keteiik, Jalǵas Jumaǵulov Ábý-Dabidegi UFC 257 týrnirinde shved sportshysy Amir Albazimen judyryqtasyp, jeńilip qaldy. Jekpe-jek tolyq úsh raýndqa sozylyp, tóreshiler biraýyzdan jeńisti Albazige berdi. Osy jekpe-jekten keiin Jalǵastyń aralas jekpe-jektegi kórsetkishi 13 jeńis pen 5 jeńilisti qurady.
Jalpy Jumaǵulov UFC debiýtin Fights Nights Global chempiony retinde ótkizdi. Al 2019 jyldyń qarasha aiynda ol reseilik Ali Bagaýtinovty jeńdi.
Ótken jyldyń shildesinde Jumaǵulov daýly sheshimmen braziliialyq Raýlian Paiveden jeńilip qaldy.
